Promesa, Realidad y Responsabilidad
ORANJESTAD (AAN): Durante un conferencia di prensa di fraccion di PPA, miembro di Parlamento Eduard Pieters a inicia na manda palabranan di pabien na nos pensionadonan debi cu a elimina parcialmente e inhusticia cu nos pensionadonan tabata pasa aden. Sinembargo Pieters a pone enfasis riba un asunto cu no por minimalisa: E trato desigual cu nos pensionadonan ta ricibi. Ta berdad cu a tuma algun paso pa coregi un parti di e inhusticia historico, e implementacion actual a revela un problema mas profundo, un sistema cu no ta trata tur pensionado di manera igual ni transparente.
Un aumento pa un mitar grupo: “Gobierno AVP–Futuro a introduci un reparatietoeslag cu tin como meta principal, balansa e impacto di e aumento constante di costo di bida. Teoriticamente, esaki tabata un paso den direccion corecto. Sinembargo, e resultado ta fragmenta. Un grupo di pensionado a beneficia, mientras otro grupo, cu mesun necesidad y mesun presion financiero, no a ricibi nada,” Eduard a señala.
E consecuencia di esaki ta tangibel.
Den supermercado, botica y pago di cuenta basico, e pensionadonan ta confronta un realidad cu no ta uniforme. E division entre “esun cu a haya” y “esun cu no a haya” no tin base husto ni social ni moral. Ora poder di compra ta cay riba tur hende, e solucionnan selectivo no por ta aceptabel.
E promesan electoral vs. politica real: Despues di eleccion, promesa tabata cla: TUR pensionado lo haya aumento! Awe, gobierno ta presenta un aumento di 250 Florin, pero cu e condicionnan cu ta exclui un grupo significativo. Esaki no solamente ta un cambio di rumbo, pero un ruptura di e palabra cu a duna pueblo.
Parlamentario Pieters a sigui bisando, “Mas ainda, e declaracionnan publico cu e medida ta “pa tur pensionado” no ta refleha e realidad. Pa fraccion di PPA, esaki ta un problema di credibilidad y gobernansa serio y transparente. Politica social no por basa riba mensahe incompleto ni interpretacion selectivo. Nos pensionadonan mester sa unda nan ta para, kico nan por spera y pakico nan ta wordo trata diferente”.
Un yamada pa politica husto y transparente: Fraccion di PPA ta pone riba mesa un posicion cla: no por tin pensionado di prome y di dos clase. Si gobierno ta reconoce cu e nivel di pension no ta suficiente pa cubri costo di bida, e contesta mester ta general y structural, no parcial.
“PPA ta boga pa un linea recto y husto pa tur pensionado, cu punto di salida pa yega na un entrada, cu ta yega mas cerca posibel di e ‘bestaansminimum’. Esaki ta implica regla cla, criteria transparente y implementacion cu no ta discrimina. Husticia social no ta un fabor politico; ta un obligacion di pais y gobierno”.
Respet pa Nos Grandinan: “Nos pensionadonan a construi Aruba cu nan trabao y sacrificio. Nan no merece e promesanan cu no por cumpli, ni medida cu ta exclui nan di manera silencioso. Gobierno cu ta papia di progreso mester demostra esaki den accion, no solamente den palabra,” Eduard Pieters a finalisa bisando.
“PPA lo sigui alsa su bos pa dignidad, igualdad y respet. Pa nos, e pensionadonan no ta un estadistica, nan ta nos grandinan y nan merece atencion serio, trato husto y un politica cu ta inclui tur, sin excepcion!”.
