Parlamentario Eduard Pieters:
ORANJESTAD (AAN): Fraccion di PPA ta papia cla y sin bira mucho: inhusticia no por ta mitar elimina! Aunke gobierno a tuma un paso pa corigi un problema riba pago di prima di AZV pa un grupo di pensionado, e decision cu a sigui a laga un otro grupo atras. Politica social cu ta basa riba un linea arbitrario no ta soluciona problema, pero ta crea un forma nobo di discriminacion. Fraccion di PPA ta para firme riba e principio, cu tur, pero tur pensionado merece trato igual, sin excepcion!
Un blafon cu ta crea discriminacion: Segun Eduard Pieters: “Gobierno a introduci un blafon: e pensionadonan cu ta gana 2.500 Florin pa luna (30.000 Florin pa aña) ta haya dispensacion y no tin cu paga e prima di AZV. Pero e pensionadonan cu ta gana 2.501 Florin pa luna, pues no ta importa cu ta un diferencia di un Florin, ta exclui. Nan si mester paga e prima, inclusivo e werkgevers y werknemers bijdrage, sea na fin di luna of via declaracion di impuesto”.
Pa PPA, esaki ta inaceptabel. “E linea cu gobierno a trek no ta social, no ta humano y ciertamente no ta husto”.
E proposito real di e medida no ta cumpli: Gobierno a introduci e reparatietoeslag cu e argumento di mehora poder di compra. Pero realidad diario ta mustra algo diferente. Den supermercado, botica of pago di cuenta, no tin ningun distincion entre un pensionado cu ta gana 2.500 Florin pa luna y esun cu ta gana 3.000 Florin. E costo di bida ta dal tur mescos, sin mira cifra exacto riba papel.
“Si bo ta declara, cu bo kier elimina inhusticia pa e pensionadonan, bo tin cu haci esaki completo, no selectivo. Un politica cu ta cubri un grupo y exclui otro no ta soluciona inhusticia, ta simplemente move e problema un tiki mas leu”.
Pa Eduard ta importante pa Gobierno sali papia e berdad completo. “Esaki ta aplica tambe pa ambos fraccion di gobierno, AVP y Futuro. Nan tin cu sali duna cara y bisa e berdad na pueblo. No mitar berdad, no mensahe cu ta cumbini pa campaña, pero claridad y honestidad riba impacto real di nan decisionnan”.
Finalmente pa fraccion di PPA, e asunto aki no ta uno tecnico ni administrativo, sino uno humano. “No por tin dignidad pa un pensionado y pa ningun otro, basa riba un diferencia riba papel. Gobierno tin un responsabilidad pa corigi esaki tambe y elimina e inhusticia completamente, no selectivamente. Nos pensionadonan a dedica nan bida laboral na Aruba; nan merece respet real y un politica cu ta inclui tur.
AZV tin surplus: BAZV ta genera basta placa pa e caha di AZV. Banda di esaki tur asegurado cu ta traha tambe ta aporta na e caha di AZV. Pa presupuesto 2026, AZV tin surplus di basta miyon di Florin presupuesta. Pakico no por duna TUR pensionado e dispensacion aki? Pakico no por elimina e inhusticia aki pa TUR nos pensionadonan?
PPA lo sigui insisti riba un solucion husto, transparente y igual, pasobra inhusticia parcial ta sigui ta inhusticia,” Eduard a finalisa bisando.
