Parlamentario John Hart, fraccion AVP:
ORANJESTAD (AAN)-- Parlamentario John Hart, di fraccion di AVP, a bisa den entrevista cu Matutino DIARIO, cu e minister encarga cu trafico a duna di conoce cu tin un comision cu a bin cu cierto recomendacionnan, y parlamento lo kier scucha e recomendacionnan aki.
Esaki ta parti di Aruba su infrastructura, den combinacion cu e cantidad di autonan cu ta circula den nos pais.
“Ta conoci cu hasta tin cuater of cinco auto den cura y tambe ta yega e momento cu nos tin cu bay tuma un decision con nos ta sigui ‘going for’.
Nan ta temanan importante, di nos parti nos ta contento cu, alomenos, e decisionnan aki ta wordo hiba den Parlamento, pasobra akiden nos tin cu tuma decision. Si nos tin cu cambia e ley e tin cu tuma lugar akiden, pero nos tin cu cambia tambe e discusion; bay legumai tira culpa un rato. Ban tuma e decisionnan cu mester pa drecha e pais aki”, Parlamentario Hart a expresa.
E parlamentario a señala cu den direccion di tecnologia mester bay, el a bay bishita, por ehemplo, na Savaneta full e cameraroom di Cuerpo Policial, y a mira cu Aruba tin hopi potencial, pero esaki ta parti di e debate y discusion, con “nos ta going for”.
“Mi ta kere cu nos mester cuminza na cualkier maneho cu ta yuda cu prevencion”, Hart a señala, agregando cu tur hende sa cu na Aruba tin un urgencia grandi, pero cu tambe tin scarcedad di capacidad di personal.
“Ami no por bisa ‘mi kier’e pa mañan, pasobra e no ta realistico. Pero loke si ta importante ta pa nos pone e señal claro pa Minister, pa gobierno.
Minister a bin akinan dos siman pasa, y el a splica den placa chikito, e trayectoria cu e ta canando, anto cu p’e tambe ta un prioridad. Kiermen, nos ta mesun liña riba esey, y aworaki mester zorg pa wordo ehecuta y mas pronto e ley bin, mas lihe nos di parti di Parlamento lo asumi nos responsabilidad pa trat’e. Si ta pa mi, e bin mas pronto posibel, pero pa pone un termino, e ta dificil”, Parlamentario John Hart a remarca.
