Pabien na Comision Nacional di Cambio Climatico cu plan Corvi

Fraccion di Mep:

ORANJESTAD (AAN): Recientemente Fraccion di MEP tabata presente na e presentacion di e rapport di CORVI. E National Climate Resilience Committee (NCRC) ta preparando un plan nacional pa adaptacion pa cambio climatico, National Adaptation Strategy.

Pa logra esaki e comision a haci un estudio amplio di tur e riesgo y impacto di cambio climatico na Aruba. “E mainta aki nan a presenta e 'Climate & Ocean Risk & Vulnerability Index CORVI' rapport cu a wordo prepara hunto cu Stimson Center. Ya na mei ultimo, nan a lansa e 'Climate Impact Atlas' di Aruba, obtenibel riba e website www.aruba.climateimpactatlas.com. E website aki ta contene tur informacion, data, estadistica y mapa digital di cambio di clima pa Aruba. Ademas ta inclui varios storia inspirativo tocante con por adapta na cambio climatico riba e website.

E proyecto aki tabata un iniciativa di ex-colega minister Ursell Arends cu sosten di Gabinete Wever-Croes 2, y awe e ta bira un realidad. A base di e rapport aki lo traha e plan pa Aruba ta prepara pa e efectonan di cambio climatico.

"Mi ta hopi orguyoso di e trabou haci! Asina nos por garantisa cu e dushi tera di nos ta keda tambe pa nos futuro generacionnan”, Tabata palabranan di Evelyn Wever-Croes