Parlamentario Jennifer Arends-Reyes:
ORANJESTAD (AAN): E parlamentario di AVP y presidente di Comision di Turismo, Señora Jennifer Arends-Reyes, ta expresa su preocupacion tocante e crecemento rapido y sin regulacion di e sector di short-term vacation rentals (STVR), conoci tambe como Airbnb y otro tipo di huur cortico. Segun e parlamentario, Aruba ta experimentando un aumento constante den e cantidad di propiedadnan cu ta uza pa huur cu turista, sin cu e desaroyo aki ta compaña pa e control necesario di ley, control y transparencia.
Durante e periodo di 2018 te 2024, estadisticanan oficial ta mustra cu hospedahe via plataforma manera Airbnb a subi cu 71%, mientras estadia den hotel a baha cu 2% y den timeshare cu 13%. E tendencia aki ta refleha un cambio cla den preferencia di turista, pero tambe ta crea un presion grandi riba e comunidad local, riba e disponibildad di vivienda y riba e sector hotelero tradicional cu ta haci un gran esfuerso pa cumpli cu tur regla y impuesto.
Organizacionnan manera AHATA y otro entidad den turismo ya a adverti cu falta di regulacion ta crea un situacion di competencia desleal. Hopi di e STVR no ta paga impuesto manera mester, ni ta cumpli cu normanan di siguridad, higiene y zoning, cu ta pone tanto e turista como e bario na riesgo. Ademas, den hopi area residencial, presencia creciente di huur tipo Airbnb ta cambia e dinamica di e bario, y ta haci mas dificil pa hende local haya un cas pa huur of pa cumpra na un prijs razonabel.
Sin duda, e sector di short-term rentals por sigui ta un fuente di ingreso pa hopi famia Arubiano, pero e crecemento no por bay sin control, ni sin proteccion pa e interes general di e pueblo. Segun e parlamentario Arends-Reyes, e situacion actual ta pidi pa accion y un politica di regulacion cu ta promove transparencia, sostenibilidad y un desaroyo mas balansa den turismo.
E representante di AVP a presenta un mocion riba 25 di augustus 2025, solicitando pa gobierno tuma accion concreto pa regula e sector. E mocion ta pidi competencia husto entre STVR y hotelnan tradicional, cobranza fiscal y pagonan debido, y cumplimento di normanan di siguridad, calidad y control.
“Aruba no por permiti cu e turismo sigui desaroya den un forma desbalansa” a conclui Arends-Reyes. “Esaki ta un asunto di sostenibilidad, husticia social y respet pa nos comunidad.”
