Parlamentario Edgard Vrolijk ta urgi presidente di Parlamento:
ORANJESTAD (AAN)-- Den entrevista cu Matutino DIARIO, Parlamentario Edgard Vrolijk, fraccion di MEP, a referi na e Ley di Seguridad den Trafico.
Siman pasa, mr. Vrolijk a entrega e relato final pa cu e ley di iniciativa di Fraccion di MEP pa trece mas seguridad den trafico, cual ta cla pa wordo trata y ta pendiente di e Presidente di Parlamento señor Marlon Sneek.
“Den esaki nos a contesta tur e preguntanan cu parlamentarionan a haci na nos persona, tocante e ley, nos a haci entrega di esaki Diamars ultimo, cu speranza cu ta algo urgente, cu por a wordo trata siman pasa caba, pero esaki no ta e caso.
Nos a habri cu speranza cu e siman aki por a wordo trata pero nos a wak cu e siman a cera y no a wordo yama, y pa otro siman tampoco nos ta wak cu no tin espacio pasobra e prioridad ta pa comisionnan.
Di akinan nos ta haci un apelacion na Presidente di Parlamento pa atende cu esaki, mirando cu su propio persona a priminti cu den menos cu un luna, si ta posibel, y na e momento aki e ley ta cla p’asina e ser trata y asin’aki nos pasa door di e odisea aki cu locual ta crea concientizacion den e comunidad pa locual ta maneha auto di manera iresponsabel”, Parlamentario Edgard Vrolijk a acentua.
