Parlamentario Rocco tocante viahe den jet priva di e mandatario:
ORANJESTAD (AAN)-- Parlamentario Rocco Tjon, di fraccion di Partido Movimento Electoral di Pueblo (MEP), den Conferencia di Prensa a remarca cu, manera tur hende por a tuma nota, e deadline pa Minister Gerlien Croes contesta e preguntanan tocante e biahe cu el a haci na Curacao, den jet priva, a yega.
E Parlamentario a bisa cu hopi pregunta el a keda sin contesta, y hasta den sala di Parlamento, el a mal informa miembronan di Parlamento y su mesun coleganan, entre otro Minister Geoffrey Wever, cu a confirma cu e no a contesta e preguntanan cu e Parlamentarionan a haci su persona.
“Mirando e hecho cu e no a contesta e preguntanan aki, nos a haci uso di un peticion, a base di ley, cu ta obliga e minister na duna contesta.
“Si e no haci esaki, logicamente nos lo tuma e siguiente paso y esey ta cu nos lo bay Corte. E ta importante tambe pa pueblo sa tambe cu nos a haci peticion tambe, entre otro na Presidente di Parlamento pa yama un ‘vragen uur’ cu Minister Wendrick Cicilia, pa di e forma ey e Minister di Transporte, por confirma e hecho cu Minister Gerlien Croes nunca por a paga p’esaki”, Parlamentario Rocco Tjon a remarca.
Tjon a sigui bisa cu banda di esey, siman pasa fraccion di MEP a logra e confirmacion di un Oficina di abogado na Merca, cu lo bay haci un investigacion pa nan. “E lo duna nos un ‘legal opinion’ pa nos, basa riba leynan vigente di aviacion di Aruba pero tambe di Merca, pa di e forma ey nos por confirma cu locual Minister Gerlien Croes a trece padilanti, no ta cuadra cu realidad”, Parlamentario Rocco Tjon a subraya.
E Parlamentario a expresa cu e lo tin pueblo na haltura di tur e sucedido aki, y na fin di luna ora nan haya e resultado nan lo informa tocante e conclusionnan, a base di e leynan vigente di Merca, pa mustra cu locual Minister Gerlien Croes a trece dilanti no por ta e berdad, Tjon a reitera.
