Parlamentario Endy Croes di Fraccion di MEP:
ORANJESTAD (AAN): Reunionnan di Interparlementair Koninkrijksoverleg (Ipko) a termina. Ipko 2026 ta confirma su rol como un plataforma esencial pa dialogo, transparencia y responsabilidad di paisnan den Reino cu meta pa consolida un Reino resiliente, basa riba respet mutuo y cooperacion solido.
Diferente topico a wordo trata durante e tres dianan di Ipko na Aruba. Parlamentario Endy Croes di Fraccion di MEP a remarca cu un di e highlights tawata e presentacion di Aruba Airport Authority (AAA) y e bishita cu e delegacionnan di Reino a haci na aeropuerto. Nan a haya un recorido amplio di e proyecto “Aruba Gateway 2030”. Un proyecto cu ta resalta e ambicion di Aruba pa posiciona su mes como un hub di aviacion y logistica sostenibel.
Parlamentario Croes a remarca cu esaki ta un inversion grandi pero na su luga, moderno y bunita. Algo cu, segun Parlamentario Croes, a capta hopi atencion ta e ‘baggage belt’ bon poni den otro y completamente automisa, cu ta unico den Sur America y Centro America y den e region aki.
E Parlamentario a menciona cu e debatenan durante Ipko tawata intenso y na su luga, y mas importante tawata e network cu a crea entre delagacionnan. Un cos sigur, Fraccion di MEP a percura pa e mensahe di Hofa keda treci y e posicion di Partido MEP a wordo bon gestempel como tambe bon capta pa e Parlamentarionan Hulandes, enfatisando cu MEP ta contra di Hofa pa diferente motibo.
