*E ta encera varios cambio structural
*Uno ta no un gobierno di 4 aña sino di largo plazo
ORANJESTAD (AAN) — Otmar Oduber, den su calidad di lider politico di PPA, a splica e motibo pa cual nan lo entrega awe, su lista di candidatonan na Fort Zoutman. Esaki ta pasobra PPA hunto cu su candidatonan y su “Think Tank” Pais, lo presenta, su plan “Nos Aruba”, cu ta un plan di 2025-pa 2050.
“E ta un plan di 25 aña largo, un vision largo, riba tres punto specifico cu ta encera un cantidad di punto cu ta na interes di nos comunidad”, Oduber a subraya.
El a reitera cu e wordo presenta e dia aki, unda cu no solamente e puntonan cu nan a sinti for di comunidad y cu despues di varios reunion a conclui cu e puntonan aki mester haya enfasis.
Un di e puntonan aki ta inclui “un gobierno no di cuater aña sino un gobierno a largo plazo cu ta pone un plan dilanti pa trece cambionan structural na Aruba, manera ta tumando lugar na e momentonan aki”, Oduber a remarca.
El a subraya cu den un periodo di tres siman, despues cu PPA presenta esaki, e lo ta reuniendo cu pueblo di Aruba den gruponan di enfoke, haciendo campaña na mesa sinta cu e gruponan y “nos lo percura cu input di tur e gruponan aki, pa dia 12 di November entrega e plan Nos Aruba completo, cu input di comunidad di Aruba, di tur instancia y di tur nos candidatonan caminda cu no solamente e ora ey e lo ta e plan pa e proximo 25 añanan (2025-2050) pero cu den dje lo tin e programa di gobernacion pa e proximo 4 añanan cu Partido Patriotico di Aruba ta presenta como oferta na nos comunidad” Otmar Oduber a enfatiza.
