Na opinion di Partido MEP:
- MEP ta e unico Partido cu por ofrece stabilidad politico, economico y financiero na pueblo
ORANJESTAD (AAN): Pueblo a mira e ultimo simannan di campaña cu e “politiconan” nobo ta profilando nan mes como e solucion y presentando nan mes como nobo y moderno. Den practica esaki a resulta di ta un decepcion total! Campaña ta den full swing y loke nos a nota ta cu e enfoke keto bay ta riba e hende y no riba presenta un vision cu lo mehora calidad di bida di nos hendenan.
Atakenan baho riba persona y politico sin por ofrece solucionnan pa problemanan. Nos no ta scucha kico lo worde haci diferente. Si acaso kier bisa cu MEP a goberna malo, kico ABO, como “politico” nobo y moderno lo haci diferente.
A mira con e junior partner Raiz den coalicion ta brasa corupcion. Con junior partner ta cera deal cu AVP pa bira e coalicion nobo. Un decadencia formal den politica caminda integridad a keda solamente un palabra bunita cu nunca e junior partner por a cumpli cu ne. Raiz no a kibra e kopie di integridad sino el a kibra e set di servies completo! Na momento cu bo ta vota y cera deal cu un convicto, e ta bisa suficiente di bo moralidad!
Pesey Partido MEP ta hopi contento cu eleccion ta 06 december 2024 pa asina pueblo huzga esnan cu a purba destrui e pais aki. Nos por ta testigo con un politico cu ta minister di un partido di coalicion ta bay laga e partido y ta keda minister formando parti di un partido di oposicion. Un locura completo, mundo riba su cabez. Esaki ta pone de facto cu mayan no necesariamente bo mester ta candidato riba un lista politico pa bira minister di un partido sino formando parti di un otro partido bo lo por bira minister di un otro partido.
Pueblo por compronde si ta con bruha politica nobo y moderno ta! Ta pesey ta importante pa un pais tin stabilidad politico, economico y financiero. Mep ta e unico partido cu por ofrece esaki na nos pueblo.
