Otmar Oduber lider di PPA:
ORANJESTAD (AAN) – Awe, Diabierna 18 di October, Partido Patriotico di Aruba(PPA), lider pa Otmar Oduber, ta bay presenta y entrega su lista, pa 12’or di merdia.
Otmar Oduber a indica cu e cambio di mainta pa merdia, ta mustra e cambio cu ta bay tin den e proximo eleccion, e aire fresco ta bay bula y cu lo refresca e comunidad di Aruba, na momento cu PPA lo presenta su lista.
Oduber a bisa cu pa awenochi caba PPA lo concretiza esaki, den nan Conseho di Partido, manera nan statuto ta prescribi, pa esnan cu lo forma parti di e proximo lista.
“Mi kier haci un invitacion na prensa y comunidad di Aruba, nos lo ta na Fort Zoutman, pa 12 or di merdia. Esey ta e ora cu nos a ricibi for di Conseho Supremo Electoral pa entrega nos lista. Nos kier mustra cu nos tin cambio na pecho, di berdad; y manera cu pa prome biaha ta e caso, e aña aki, e listanan por wordo entrega digitalmente, pa 12 or en punto nos lo ta entregando esaki, digital, for di Fort Zoutman”, Oduber a reitera.
Otmar Oduber lo t’ey hunto e candidatonan di PPA, den presencia di prensa, naturalmente, y nan a tuma e decision di hacie diferente y nan actonan mester mustra esey, for di cuminzamento caba.
“Nos lo entregue pa 12 or en punto, digital, nos lo percura manera e reglanan ta tambe, cu prome cu 24 ora despues di e fecha aki esaki ta wordo entrega den half copy na Conseho Supremo Electoral”, Oduber a splica.
El a sigui bisa cu e motibo pa cual lo ta na Fort Zoutman ta pasobra Partido Patriotico di Aruba, cu su “think tank” den e caso aki Pais, hunto cu su candidatonan, lo presenta “Plan Nos Aruba” cu ta un plan di 2025 pa 2050.
