Eduard Pieters di PPA:
ORANJESTAD (AAN): Dialuna mainta den e reunion publico di Parlamento di Aruba Eduard Pieters di PPA a manda un aviso serio na gobierno y pueblo: bou di e trayecto actual di Rijkswet HOFA, Aruba por perde mas derecho cu gana cualkier beneficio. El a recorda cu Aruba su autonomia, constitucion y bos di pueblo no ta negoshabel.
Mandato mester ta di pueblo y no di partido: Segun Pieters: “Si nos ta bisa NO na Rijkswet, esey ta bos di pueblo.” E mandato ey ta cla, paso tin un mayoria cu no kier un ley cu kita poder local. E debate riba e Rijkswet HOFA ta bira mas cu un diferencia politico, paso ta un cuestion di principio nacional. Den su discurso e mainta aki, ta bon pa pueblo sa cu e ley aki por costa Aruba su poder pa maneha su propio destino.
P’esey Eduard ta pidi gobierno y su coleganan di parlamento pa reflexiona, paso bou di e promesa di placa y apoyo financiero, ta sconde un realidad cu Aruba por perde control riba su autonomia y su bos democratico.
Minister di Finansa a papia di haya placa, mehora poder di compra y haya un fondo di inversion, pero ainda no tin un plan cla of un garantia concreto. Pieters a puntra: “Si fondo di inversion ainda no ta funcionando, con Aruba por haya beneficio real di interes reduci? Kico ta e normanan cu nos mester cumpli? Sin claridad, Aruba ta risca pa perde su derecho di maneho presupuestario.”
Alarma constitucional: Basa riba Articulo 38 di HOFA y punto 5 di e Acuerdo, e Conseho di Ministro di Reino mester aproba e reglanan financiero di Aruba prome cu nan drenta na vigor. Pieters a puntra: “Esey acaso no ta mina e derecho soberano di Parlamento pa maneha su presupuesto?” El a añadi cu den un caso asina, e bos di Aruba ta sustitui pa e decisionnan di Den Haag, un situacion totalmente inacceptabel.
Eduard Pieters a cera su discurso cu un apelacion nacional: Aruba ta na un crusada historico. Nos por busca placa, pero nunca a costo di nos libertad. E mensahe di PPA ta cla: ningun fondo, ningun ley di Reino no por tuma lugar di nos derecho soberano. “Nos ta un pueblo cu ta manda riba su destino, no un colonia cu ta firma sin sa e consecuencianan,” Pieters a termina bisando.
