Parlamentario Jennifer Arends-Reyes:
ORANJESTAD (AAN): Señora Jennifer Arends-Reyes, mescos cu otro coleganan di fraccion AVP, a pone atencion na splicacion cu ministernan di Gabinete AVP/Futuro a brinda riba pregunta di miembronan di parlamento durante continuacion di tratamento di HOFA.
Posteriormente e lider di fraccion berde a conclui cu e debate aki no ta djis tecnico; e ta esencial pa futuro financiero y pa e stabilidad social di Aruba. Ta importante pa pueblo compronde loke ta riba mesa y kico e ta nifica pa nos pais.
Durante discurso reciente, Minister Presidente Mike Eman a destaca e diferencia crucial entre modelonan manera RAFT y COHO, cu no tabatin input di Aruba y e trayecto pa yega na e concepto actual di Rijkswet HOFA ta un proceso cu tin casi dos aña di negociacion y intercambio.
E necesidad pa restructura finanzas publico no a surgi sin mas. E ta bin for di e crisis di pandemia di 2020, ora turismo e motor economico di e pais a conoce un paro total. Entrada di gobierno a cay, mientras gasto pa sostene pueblo a subi. Pa por sobrevivi e momento, Aruba a ricibi sosten financiero di Hulanda na balor di casi 1 biyon Florin, pero esey a bin cu condicion cla: nos tin cu traha pa stabilisa e finanzas di pais pa por absorbe cualkier shock externo.
Hulanda despues a busca garantia di continuidad via un cuadro legal na nivel di reino. Asina a sigui e discusion riba Rijkswet HOFA.
Si no ta trata esaki cu claridad of ta par’e abruptamente, e confianza internacional lo cay, refinanciamento di nos debe lo bira mas caro y mas fondo di nos pueblo lo bay pa paga interes na lugar di por a bay pa inversion. Parlamentario Arends-Reyes: “Den un mundo cu cambio lihe y incertidumbre, nos mester para firme. Stabilidad no ta un luho; e ta un necesidad pa proteha nos futuro. Ban evalua nos ruta cu seriedad y sabiduria, pensando no djis riba awe, pero riba e Aruba di mañan.”
