ORANJESTAD (AAN): E fraccion di Movimiento Electoral di Pueblo (MEP) a entrega dos carta importante na Gobernador di Aruba,
pa pone na altura dos asunto di gran peso pa e democracia y autonomia di nos pais.
E prome carta ta referi na e situacion cu e gobierno (AVP–Futuro) a tuma e decision pa no nombra un Minister Plenipotenciario (Gevolmachtigde Minister) di Aruba na Hulanda. Den e carta, Fraccion di MEP ta enfatisa cu e Minister Plenipotenciario tin un rol vital den e relacionnan di Reino y den representacion di Aruba na Hulanda. Den mesun carta, MEP ta subraya e hecho cu tin mas o menos 700 preguntanan di Fraccion di MEP a keda sin contestacion di parti di Gobierno. Fraccion di MEP ta urgi Gobernador, den su rol, pa tuma pasonan necesario pa sigura cu Parlamento di Aruba por ricibi e informacion y transparencia den un tempo rasonabel, pa asina por reestablece e control Parlamentario.
Den e di dos carta, Fraccion di MEP ta vocifera su preocupacion riba e proceso di e proposicion pa e Rijkswet HOFA (Houdbare Overheidsfinanciën Aruba). Segun e Fraccion, Minister di Relacionnan di Reino, sra. Gerlien Croes, a firma y a bay di acuerdo riba e contenido di e rijkswet HOFA cu e Conseho di Minister di Reino (Rijksministerraad) riba 13 di augustus ultimo, sin un decision di Conseho di Minister di Aruba, y sin consenso di Parlamento di Aruba.
Fraccion di MEP ta considera esaki un falta di respet na e organo di mas halto di Aruba y pa e principionan di transparencia y responsabilidad. Den e carta, Fraccion di MEP ta ripiti firmemente contra HOFA, indicando cu e ley di Reino aki ta limita nos autonomia democratico y ta pasa e desicion financiero na un nivel di Reino (lesa: Hulanda), cu no lo ta bou di control directo di e pueblo Arubano mas.
Fraccion di MEP ta recorda mas di 10.000 ciudadano a firma di ta contra HOFA, y cu 13 sindicato, cu ta representa miles di persona, a manda nan ‘position paper’ na Gobierno expresando nan puntonan contra rijkswet HOFA, y en cambio ta bog ana Gobierno pa negosha un alternativa local.
Fraccion di MEP ta finalisa, expresando di ta spera cu Gobernador, lo percura cu e principionan di transparencia y procesonan encamina door di Gobierno y e trabou y rol di Parlamento ta wordo respeta den nos sistema democratico.
