ORANJESTAD(AAN)—Na momento cu Husticia a anuncia cu Alan Howell ta wordo investiga y Evelyn Wever-Croes mester a manda Gobierno cas pa e situacion cu a
surgi,. DIARIO a prepara su mes pa loke por a spera a base di nos experencia.
E situacion actual ta hiba nos atrobe, manera nos mes a splica na varios ocasion na e realidad cu Aruba a biba ora el a drenta su futuro como pais, cu Betico Croes a logra despues cu practicamente speransa a muri pa diferente motibo, cu nos kier lubida un rato.
Pero cambio di Aruba di teritorio insular pa un pais autonomo tabata tin beneficio.
Tur politico tabata tin chens di bira lider di e pais y bira hende importante.
Un problema tabata tin. Mester a kibra Betico Croes pa asina gosa di loke Betico Croes a logra ora otronan a faya of a nenga di haci.
Na 1985 mientras Betico Croes tabata lucha cu su bida, su opositornan cu tabata contra su lucha, a uza su lucha pa nan asumi poder na e pais autonomo Aruba den Reino.
Nan a forma nan grupito di varios partido y asina a forma e gobierno di e pais, cu segun nan plannan y esfuersonan nunca lo a existi.
For di 2020 DIARIO a cuminsa mustra Aruba cu e pais a alcansa un situacion similar.
Na 2009 Mike Eman a logra gara e poder, cu semper el a demostra cu e kier. Mike Eman a logra bira Prome Ministro na Aruba na un momento similar na 1985.
Na 2009 Aruba mester a bay eleccion den un recesion mundial cu a haci cu na tur pais na mundo nan mester a tuma medida pa aumenta nan entrada.
DIARIO tabata contra e forma cu a introduci BBO e tempo, pasobra BBO ta acumulativo.
Pa Mike Eman, BBO tabata un gran oportunidad y arma cu dos documento cu ni banco lo a acepta pa duna hende placa pa cumpra un auto, el a bisa Aruba cu e lo baha BBO na mita y deshaci di BBO.
Esaki tabata un traicion di e bienestar di Aruba y Mike Eman tabata bon na haltura cu e ta destrui Aruba financieramente. Hecho ta, cu Mike Eman nunca a bisa Pueblo cu e ta baha e placa cu e tabata gana como Prome Ministro na mita of no cobra pa traha.
Porfin Mike Eman a logra haya un trabou fiho pa e traha cu un salario aceptabel como Prome Ministro di Aruba, loke tambe a haci posibel pa e biaha hopi y asina su albumnan personal sigui yena cu portret di su cara.
Mientrastanto Aruba a keda destrui financieramente y ora Hulanda a bati na porta y a mara e mannan di Mike pa loke ta placa di Pueblo, Mike a bay Cuba.
El a topa cu Nicolas, a trece Citgo cu tabata den estado di bancarota y a trece tur e criminalnan cu Merca tabata busca pa labamento di placa pa medio Citgo, pa bin fiesta na Aruba.
Ora na 2017 Aruba a keda destrui, Evelyn Wever-Croes mester a forma Gobierno despues di un eleccion cu a permiti Mike bay sconde.
Evelyn Wever-Croes a haci loke ningun hende a spera. El a logra respet di Hulanda. El a percura pa un maneho cu a evita Aruba zink den e desaster cu Mike a laga atras.
El a manda Citgo cas y a evita cu awe Aruba ta ring di pelea pa dos gobierno Venezolano.
Awe Aruba ta prepara pa eleccion despues di un pandemia den cual Evelyn a evita cu Miles di hende lo a muri.
E hospital cu Mike a laga atras cu holor di Diesel y awa ta basha riba pashent, awe ta centro di salud di Aruba y a habri uno mas pa yuda Arubiano cuida nan bida.
Evelyn Wever-Croes a percura pa Hulanda yuda Aruba cu placa. El a trece proyectonan prometedor.
Piscina a bira dushi pa politiconan landa aden y awe diripiente tur hende kier bira politico. Con cu mira e asunto den Parlamento y Gobierno nan tin mas chens di tin entrada cu si nan mester spera situacion mundial drecha.
Awe Mike ta imita Donald Trump y ta bay bisa Gobernador cu Evelyn kier comete fraude di eleccion. Mike a resucita despues cu el a sconde pa no drenta Parlamento. Cu Mike mas politico di awa dushi, cu tin miedo di tribon den lama.
Historia di 1985 mester ripiti pa tur cu tabata contra e maneho di Evelyn haya luga den un gobierno nobo caminda problemanan a wordo resolve?
Por papia di cobardia di parti di Mike y e otro oponentenan. Pero cobardia ta un palabra mucho caro pa nan!
