ORANJESTAD (AAN): Den fin di siman ta bay tuma lugar e asina yama 'Vacunathon' cual lo ta un campaña nacional di 2 dia, diasabra y diadomingo di 8 am pa 4 pm na 4
priklocatie ubica rond di Aruba: Centro Libertador Betico Croes na Santa Cruz, Hotel Ritz Carlton na Noord, Centro Don Bosco, na Noord y Theresita Center na san Nicolas.
Minister di Salubridad Publico Dangui Oduber a indica durante un conferencia di prensa cu e campaña nacional aki ta un esfuerzo conhunto di Ministerio di Salubridad Publico pero tambe di mayoria di departamento di gobierno den un 'joint venture' cu sector priva.
El a gradici Departamento di Salubridad Publico, specialmente na Chris Goedhart cu ta e lider operacional di henter e programa di vacunacion. E ta felicit'e pa un excelente trabao cu el a bin ta haciendo desde cu a cuminsa cu e vacunacion conhuntamente cu e team di DVG pa por vacuna mas y mas hende posibel.
Banda di esaki a gradici Departamento di Bureau Rampenbestrijding Aruba (BRA), DOW, Cuerpo di Polis, Arubaanse Sport Unie (ASU) pa pone Centro Libertador Betico Croes disponibel pa haci e programa di vacunacion.
Tambe e mandatario a gradici Arubus cu ta bay pone busnan disponibel cu ta sali for di diferente distrito pa esnan cu no tin transporte pa yega te na e priklocatie. Agradecimento tambe ta bay pa Aruba Tourism Authority (ATA) pa conhuntamente cu AHATA pone e ballroom di Ritz Carlton disponibel pa pueblo por vacuna.
"Nos tin cu gradici tambe Wit Gele Kruis pa pone tur e praktijkondersteuners (POH) disponibel pa yuda nos den e vacunathon e weekend aki", a bisa.
Dies docter di cas di un manera boluntario a propone nan mes pa duna un man.
No tabata facil pa por organisa e dia aki, Oduber a remarca.
Ta bay tin mas di 200 persona riba pia. Te bayendo den e bon direccion. Ta satisfecho cui e cantidad di personanan cu ya caba a haya e vacuna, pero mester di un 'push' adicional e weekend aki pa por yega mas cerca posibel di e 'herd immunity', a agrega.
Organisando e dos dianan nacional aki y brindando e oportunidad pa tur hende 'walk-in' (bay cu bo carchi di AZV of pasport den caso di personanan cu no ta registra na Censo pero tin mas cu 6 luna bibando na Aruba) sin tin cu mester di registra pa haya nan vacuna, "nos ta convenci cu comunidad ta bay responde masalmente e weekend aki na e yamada pa asina nos tur hunto logra e meta cu nos a pone pa e siman aki pa nos por yega 65 mil persona vacuna", Dangui Oduber a enfatisa.
El a duna e noticia cu gobierno Hulandes a compromete cu na tur momento lo tin suficiente vacuna pa Aruba sigui cu su programa di vacunacion.
Aruba ta bay haya solamente e vacuna di Pfizer cu a duna un efectividad di 94% y ta e mihor vacuna cu tin riba mercado na e momentonan aki. Ta mira e resultado den comunidad unda cu menos hende ta birando malo y menos hende ta wordo hospitalisa. E casonan di Covid-19 ta bahando.
"Pesey ta momento pa nos tur hunto vacuna pa nos por flexibilisa e medidanan, pa nos por recupera nos turismo, recupera nos economia y di e forma aki e pais aki por progresa bek y tur hende por hiba un bida un tiki mas liber cu mi ta kere henter nos comunidad ta anhela di ora e pandemia a cuminsa", e mandatario a declara.
