ORANJESTAD(AAN)—Na 2016 contra tur regla di gobernacion, Gobierno Mike Eman a firma un acuerdo cu mester a entrega AVP un careda liber pa su futuro politico
mientras Aruba tabata zink den un desaster financiero nunca bisto.
E acuerdo di Citgo, e salto mas astuto di Mike Eman y su grupo, cu a pone Aruba baila mientras speransa pa futuro a wordo mata.
Pa sconde e berdad di Citgo, Gobierno Mike Eman a trapa riba ley y contra ley a firma e acuerdo cu a mara Aruba sin aprobacion di Parlamento, manera ley tabata exigi.
Mike Eman y resto di su grupo a consagra su mes como maestro di manipulacion politico na momento cu como dictador el a trapa riba constitucion y tur ley di Aruba pa evita cu oposicion di Parlamento por a tuma nota di d contenido di e acuerdo cu el a firma cu Nicolas Maduro.
DIARIO no a drumi. Ora Mike a pega den muraya na 2017 y e fli di Citgo a keda pega den medidanan cu Merca a tuma contra Venezuela, husticia a haci su mes.
Na 2018 DIARIO a bini dilanti cu e berdad na Pueblo di Aruba, cu e contracto cu Citgo no tabata tin base legal y a wordo introduci na forma ilegal sin autorisacion previo di Parlamento, cu Mike a pone bau su curatela cu e excusa cu e no kier a core riesgo cu oposicion lo a stroba e proyecto.
Esaki tabata un motibo mas pa DIARIO bay investiga kico Mike y su grupo tabata tin pa sconde y na 2018 DIARIO a bati alarma grandi pa splica Pueblo con AVP a trapa riba e estado di derecho di Aruba pa entrega Nicolas Maduro, un refineria na momento cu economia di Nicolas Maduro a wordo pone na cadena mundialmente.
DIARIO a keda fiel na e promesa cu Jossy Mehsen Mansur a haci Aruba ora el a sostene e lucha di Betico Croes y introduci DIARIO como un palanca pa defende bienestar y autonomia di e pais.
Na 2018 nos a presenta Aruba berdad di e acuerdo Citgo, cu Mike y su gobierno a pasa den Parlamento cu blackmail politico. Miembronan di oposicion mester a vota na fabor di e proyecto, pasobra Mike a uza supuesto menasa cu oposicion kier a evita Citgo di bini Aruba, pa kibra tur ley y evita cu di antemano Aruba a mira berdad di Citgo.
Cu prueba nos a para semper riba e realidad di e proyecto Citgo, cu awe ta rementa ora uno di e rapportnan mas desastroso cu nos a yega di mira den nos bida, ta splica Refineria di Aruba, cu a wordo introduci na un forma cu for di prome momento nos a critica.
Awe Pueblo tin mas motibo pa comprende pakico Mike mester a sconde! Na varios ocasion DIARIO a pidi pa Husticia investiga tur asunto relaciona cu Citgo y pa cambia ley pa nunca mas e wega di Citgo por haya ripiticion.
Kico a pasa cu placa di Aruba? Kico a pasa cu bienestar di Aruba? Awe Husticia tin den su man un rapport pa sigui cu e investigacion penal di Refineria di Aruba.
Un rapport cu DIARIO lo presenta na Aruba como prueba, cu nos a keda fiel na nos compromiso cu Aruba y lo sigui lucha pa berdad cu semper lo vence!
