ORANJESTAD (AAN): Den conferencia di prensa di fraccion di Partido Movimento Electoral di Pueblo (MEP), di Diaranzon 21 di April, parlamentario Darlaine Guedez-Erasmus a
toca e tema “abuso sexual di mucha”.
Erasmus a trece dilanti cu abuso sexual den nos comunidad, a destrui inocencia di hopi mucha y hoben, a marca bida di hopi hende y ta causando hopi daño na hopi famia na Aruba.
E aña aki, di Januari pa Maart, ya tin 18 caso caba cu a wordo denuncia. “Y Dios sa cuanto mas tin, cu no a bin dilanti, y cu ta sufriendo den silencio” el a expresa
El a agrega cu reconociendo e gravedad di abuso sexual den nos comunidad, na Juni aña pasa Parlamento a hisa e castigo minimo di 12 pa 15 aña. Parlamento a sinta cu diferente instancia y departamentonan, tambe cu e parti di cadena hudicial y e parti social.
El a subraya cu pa e abusadornan haya mas castigo; e castigo maximo, evidencia ta tur cos! Pa yega na evidencia, tin algun punto hopi necesario.
“Mi kier toca e parti di Cuerpo Policial, cu ta haciendo hopi esfuerzo riba e tematica aki. Na Augustus lo tin un curso pa capacita mas recherche pa ora di scucha e victima y e testigo, den edad bao di 12 aña. Tambe e ‘Family Justice Center’ unda e polisnan lo ta eynan cu e Departamento di Jeugd en Zedenpolitie (JZP), pa hunto cu e docternan, e team di enfermeria, Psicologonan, trahadornan social, nan tur lo ta presente, pa asina por scucha y yuda e mucha mas lihe posible. Asina, nos ta haya e evidencianan necesario, cu ta hopi importante”, Erasmus a señala. Den luna di Augustus e centro aki lo ta dunando servicio, e parlamentario a agrega.
El a menciona otro aspecto hopi importante, pa subi e castigonan pa e abusadornan, ta hiba e declaracion di e muchanan, victima y testigo.
Parlamentario Darlaine Erasmus a acentua, cu esey ta loke no ta pasando hopi na Aruba. Y pesey, ora di bay dilanti huez, dificilmente e abusadornan por haya un castigo halto.
“Ami, di mi parti mi por bisa cu ta hopi importante cu nos tene cuenta cu abuso di mucha, ora di coloca fondo pa asina por preveni cu e casonan aki pasa, pasobra e ta marca bida di hende pa semper. Pues miho evita cu esaki pasa y mi ta full di acuerdo pa nos keda analiza y mira na unda mas por coloca fondo, pa asina nos por keda progresa den e parti aki, pa e no sosode mas”, Erasmus a agrega.
E dama a comenta cu esaki no ta un problema di Aruba so, pero rond mundo nan ta buscando solucion pa e problema aki, door di tin diferente metodo cu ta wordo uza pa haci esaki.
“Y Aruba ta hopi avanza den esaki. Ta importante, pueblo, pa conhuntamente nos preveni, asina so nos ta yuda. Mi kier laga tres punto hopi importante pa bo tene cuenta cune: 1. Crea confianza: stimula e muchanan pa papia tocante cualkier problema of haci pregunta libremente. 2. Educa e muchanan riba e tema aki, segun nan edad. Asina nan por compronde kico e ta y pa nan ta pendiente tambe. 3. Na unda e mucha ta, y kico e ta haciendo?” e parlamentario a remarca.
Esaki ta tres tips hopi importante cu nos tin cu tene na dje como pueblo, pa asina nos tur por yuda y duna un man den esaki.
