ORANJESTAD (AAN): Minister di Asuntonan Social y Labor, Glenbert Croes a hiba palabra dialuna mainta durante e conferencia di
prensa di gobierno y a expresa cu nan ta tende e criticanan di entre otro di 'Stichting End Child Abuse'.
"Mi kier afirma na comunidad cu nos ta tuma tur nan criticanan sumamente na serio y nos ta tuma e momentonan cu nan a manifesta tambe aki dilanti sumamente na serio", a declara.
El a agrega cu como Minister di Asuntonan Social y Labor el a haci un apelacion no solamente na nan pero tambe na tur otro organisacionnan den comunidad pa nan participa na e reunionnan di Sociaal Crisis Plan, cu ta e team cu ta trahando riba e temanan aki, pa nan por aporta cu nan participacion y tambe na nan solucionnan, a indica.
E mandatario a laga sa cu e ta hopi entusiasma cu nan participacion como di tur otro instancia cu ta preocupa y cu tin di haber cu abuso di mucha, hende muher, hende grandi of abuso en general.
Comunidad mester di e 'wake up call' tambe pa realisa cu no por cay den un conformismo di cual a lanta foi soño ora cu e tragedia di e criaturanan a tuma lugar algun aña pasa, a bisa.
E tragedia aki a lanta tur hende for di soño y a pone cu mester haci algo pa mas casonan asina no ripiti cu consecuencianan asina grave.
Na 2017 caba, bao liderasgo di Glenda Hernandez, Directora di Departamento di Asuntonan Social, y awor cu otro pechi como Sociaal Crisis Plan Process Manager, ta coordina y ta uni tur e sectornan.
E prioridad cu como gobierno a dicidi ta cu ser humano ta central y esey ta significa cu mester compromete apoyo na e ehecucion di Sociaal Crisis Plan pero tambe fondonan.
Minister Croes a señala cu 36,8 miyon florin a wordo dedica na Sociaal Crisis Plan di cual ta agradecido pa e apoyo cu a haya tambe di Gobierno di Hulanda y el a wordo poni den ehecucion.
E impacto di e pandemia riba e crisis social ta real y ta pone un stress y un peso hopi mas grandi riba hopi famia y hopi hende cu tabata den problema caba. Pesey e minister a bisa cu e ta hopi agradecido pa e apoyo cu ta haya di Prome Minister y tur otro minister pa por sigura cu e 10 miyon florin cu falta pa termina e ultimo trayecto di e Sociaal Crisis Plan (e prome cuatro añanan).
Croes a haci uzo di e oportunidad pa gradici tur e profesionalnan cu dia aden y dia afo, den sector social, sector enseñansa, salud, husticia y tur otro sector ta trahando pa implementa e Sociaal Crisis Plan.
Hopi aña di negligencia ta exigi cu aworaki mester bay inverti den diferente plan pa mehora e cooperacion y sigura cu e mesun idioma ta wordo papia, a remarca.
E problemanan social mester sigui wordo trata cu seriedad y no ta bay camufla e berdad.
Minister Croes a finalisando bisando cu Sociaal Crisis Plan 1 pa e cuatro añanan cu nan a cuminsa na 2017, gobierno ta comprometi pa finaliz'e. E 10 miyon florin cu na dado momento, door di e pandemia mester a temporisa pa tene cuenta cu e situacion financiero, ta wordo poni bek pa asina finalisa Sociaal Crisis Plan 1.
"Nos mester di un Sociaal Crisis Plan II, un SCP II. Un Sociaal Crisis Plan pa e proximo 4 añanan. Prome cu nos yega na e Sociaal Crisis Plan di e proximo cuatro añanan, nos lo yama tur hende hunto (...) pa nos sinta cu otro, haci un assessment unda nos ta para. Nos traduci e factor impacto di e pandemia riba e crisis social cu ya caba tabata dificil", a expresa.
