ORANJESTAD (AAN): Codigo di Proteccion a drenta na vigor y ta un ley cu por ehecuta. E ta basa riba cuatro sector: social, husticia
, enseñansa y salubridad publico, asina e lider di e proyecto di Codigo di Proteccion, Sue Ann Ras a duna di conoce dialuna den conferencia di prensa.
E ley aki ta e base fundamental pa e sistema nacional di proteccion di mucha y hoben. E ley aki ta consisti di cinco paso. Recientemente a pasa e decreto nacional unda cu Minister Glenbert Croes y Minister Andin Bikker a firm'e, a bisa. Esey ta duna un indicacion caba cu e ley a drenta na vigor y den e luna aki e mester keda cla.
"E codigo di proteccion nos a arubanis'e. Kiermen ta locual nan ta ehecuta na Hulanda, cu tambe ta conoci como e 'meldcode', pero nos mester bay mas den e parti unda nos ta duna proteccion", Ras a indica.
Esey tabata un conseho cu Hulanda mes a duna pa no bay riba e parti di enfatisa riba meld, pero con por duna e proteccion na e hobennan. Esey ta keda na e profesionalnan cu lo por haci'e, a remarca.
A integra di biaha e curso 'Signs Of Safety' como un herment dentro di e ley di Codigo di Proteccion, segun Ras.
Tin reunionnan andando ainda cu e sectornan. Tin cuatro lider di proyecto y cada lider ta ehecuta tanto e parti di e fase di con por implementa e codigo di proteccion dentro di e maneho diario di cada instancia. Tambe e ta dirigi riba haci presentacionnan y splica kico e codigo di proteccion ta encera hunto cu e parti husticial y despues nan mes por wak con por implementa esaki dentro di nan maneho diario como tambe duna asistencia inmediato, a bisa.
Automaticamente no ta bay meld mas manera tabata haci den pasado. Esey a pone cu Bureau Sostene Mi, den pasado, tabata tin un melding asina grandi pasobra tur hende tabata meld.
Aworaki ta basa riba kico e profesional por haci na e proteccion di e mucha. Tin cinco paso cu mester sigui y si den e cinco pasonan ey ta indica cu e ta un caso cu e profesional ey mes no por duna ayudo of resolve e problema y ta wak cu ta un problema structural of e mucha su bida ta den peliger, e momento ey e profesional lo haci su notificacion na Bureau Sostene Mi, Sue Ann Ras a señala.
