ORANJESTAD (AAN) — Na 2016 Pueblo di Aruba a baila. Pueblo a gosa y pueblo a brinda riba un futuro, cu ni riba papel tabata existi.
E base legal di Aruba a spart for di otro na momento cu gobierno Mike Eman, a kibra reglanan y leynan di e pais pa yega na un acuerdo cu Nicolas Maduro, cu Mike a topa durante un bishita na Cuba.
Ta na e pais di Fidel Castro e Cristian Democrat Mike Eman, a yega na un acuerdo cu Nicolas Maduro pa trece e proyecto Citgo Aruba.
Nicolas Maduro tabata sumamente contento pa un motibonan cu no a wordo splica na Pueblo di Aruba.
Den e tempo cu Aruba tabata negocia cu Venezuela, ya autoridad penal di Merca tabata tras di dirigentenan di Citgo pa motibo cu nan tabata laba placa y comete otro crimennan manera a bini dilanti den salanan di Corte Mericano.
Husticia Mericano tabata tras di Nicolas Maduro pa delitonan cu nan tabata pone como acusacion na su contra mientras mescos cu otro pais, Merca tambe tabata tras di figuranan manera Nelson Martiuez y e otro gran amigonan di Mike Eman y Mike de Meza, cu na Aruba tabata wordo trata como rey.
Cuanto placa di Aruba a wordo gespart pa paranda di refineria na Merca, no ta conoci. Pero awor rapportnan cu por mira luz, lo papia un palabra cla y lo sostene tur e informacionnan cu DIARIO a trece dilanti den investigacionnan cu el a realisa na 2018 ora e holor di Citgo tabata mata hasta djaca.
E wega di Citgo a destrui Aruba cu Mike Eman y su grupo a hinca den e ilusion cu lo bira rico. Economia di Aruba a wordo paralisa en espera di Citgo. Stabilidad di e pais a wordo destrui y hopi cas comercial pero tambe Arubiano trahado a cuminsa hinca placa den forma cu nan tambe lo por a participa den e economia mentiroso di Mike Eman na 2016.
Hamas un Gobierno a logra haci cu Aruba loke Gobierno di Mike Eman a haci. A nenga Parlamento di Aruba oportunidad pa mira e acuerdo cu a firma na nomber di Aruba contra Ley.
E documentonan oficial riba e loke a pasa den caso Citgo ta duna tur splicacion. Pero awor tin un rapport forensico tambe cu por splica kico den seno di Refineria di Aruba, a haci cu placa di Pueblo di Aruba y con a fiesta mientras tabata sa cu ta den aventura a hinca Aruba.
No tin palabra pa splica kico Mike Eman y su grupo a haci cu Aruba, pero cu awe mester bini dilanti ora berdad duna pueblo tur splicacion.
Pa termina paranda di Citgo mester haci manera DIARIO a haci. Busca informacion na Merca. Bay mira kico den salanan di Corte tabata papia di e hendenan di Citgo cu a bira partner di negoshi di Aruba.
Laga Cortenan na Merca splica cuanto hende di Citgo a bay cera y laga Nicolas Maduro bisa pakico el a tira Martinez y Perreira den prizon caminda Martinez a muri!
Na mundo nada ta keda scondi. E wega sushi cu a wordo hunga dor di AVP sostene pa su grupo di angel y santonan den Parlamento cu a laga Mike haci y deshaci loke e kier, ayera a horca Aruba.
Awe berdad lo sali dilanti. Berdad di e abuso y desprecio, hasta bofon mas grandi cu por a haci contra un pueblo manera Aruba cu a kere cu Mike lo trece placa na Aruba cu e instalacionnan bieu di Lago, cu Henny kier a desmantela ora el a sinta como Prome Ministro.
Awe husticia ta haci su mes na Aruba pasobra berdad ta sali na cla pa pueblo sa, kico a pasa na Refineria di Aruba y pakico na 2018 DIARIO a acusa gobierno anterior a base di informacion concreto di a crea un puzzel financiero cu a permiti sconde tur loke mester keda divulga!
E ora a yega pa cera e circulo den Parlamento, cu tur berdad riba mesa!
