Mike Eman a constata cu barionan a bay atras

ORANJESTAD (AAN) Prome Minister señor Mike Eman, den entrevista cu DIARIO,

a señala cu ta hopi veridico e preocupacion cu algun ciudadano tin, tocante e deterioro existente den diferente Bario, na Aruba.

   “Cada bez cu nos drenta den e barionan, nos tin e mesun sentimento cu ta wordo expresa, y pa nos tambe ta un pregunta con cosnan por a bay atras di e manera aki. Gobiernonan anterior a inverti hopi, durante mi periodo, den renovacion den barionan, pero durante e ocho añanan cu a pasa no a mira mantenimento”, Eman a señala.

   E dignatario a expresa cu si tin algo cu e por a siña tambe di e esfuerzonan haci, den e tempo anterior di su gobernacion, ta pa haci cosnan cu no ta mara unicamente na interes specifico, kizas di un mandatario, of gobierno specifico, pero wak con pa garantiza cu si despues, mañan, tin otro gobierno, cu por ta tin otro prioridadnan, e barionan no ta bay atras manera nan ta bayendo awo.

Prome Minister a menciona cu un peticion cu nan ta scucha den e barionan cu nan ta bishita, ta pa nan crea asociacionnan di bario. Por ehempel manera tin den Bario di Mabon.

“Manera bario di Mabon, cu tur ciudadano ta bin hunto, nan ta elegi un bestuur, e bestuur ey ta forma un Fundacion of un Asociacion y nan ta bay yuda percura pa e bario. Propio responsabilidad tambe ta importante, pero nan ta bay yuda tambe pa vigila cu ora gobierno of FCCA, no ta cumpli cu nan deber, cu nan por sali afo papia cu hende cu por pone presion”, Minister Presidente a indica.

El a subraya cu esey ta haci falta. Barionan, silenciosamente, a bay atras sin cu a wordo scucha y awe ta mira e resultado.

“E motibo cu hopi biaha no a expresa nan mes, ta pasobra ningun sa ta cual ta yama pa expresa nan mes. Kiermen, un cos cu nos por a siña for di esey, ta ban no unicamente drecha tur cos cu mester drecha atrobe, y esey nos ta haciendo na e momentonan aki, pero ban organiza e barionan tambe na un forma cu lo tin continuidad”, Prome Minister Mike Eman a declara.