Otmar Oduber:
ORANJESTAD (AAN): Durante e conferencia di prensa ultimo, lider di fraccion di PPA, Otmar Oduber, ta cuestiona fuertemente e mentalidad cu tin na Aruba, cu ta esun cu ta stroba hopi oportunidad y desaroyo. Pronkia cu un proyecto grandi unda un hende so ta beneficia di dje, compara cu inverti den un proyecto unda henter un comunidad y bario por haci bon uzo di dje, ta di lamenta masha, ya cu ta placa di pueblo. Y sigur ta inaceptabel cu den e epoca aki, gobierno ta tribi di nombra yen di hende, djis pa complace y ahusta cierto persona. Esaki ta leu di ta un politica ‘moderno’ cu tanto a propaganda cu ne den campaña.
Beneficia 1 persona en bes di comunidad
Tin un mentalidad di inverti den 1 proyecto di mata, di cual 1 hende ta hay’e, en bes di inverti den tur Centro di Bario, cu tin mester di dje y comunidad lo sali beneficia. “Con por ta posibel, cu den e epoca aki, unda nos ta tende nombramento di tur sort’i titulo cu nos no tabata conoce antes, manera manager di districto, diplomatico di cultura y e pober directivanan di Centro di Bario mester traha pornada. Y sin laga afor, cu nan ta cu un cantidad di boluntario. Algo ta completamente robes!”, Oduber a duna como critica. “Ta di lamenta cu nos no ta para un rato keto, na esunnan cu ta dunando nan alma y cuerpo na e comunidad di Aruba. “Mientrastanto, gobierno ta pone 70 miyon florin den un fondo di inversion, cu nos niun no sa ki inversion e ta, paso asina bon e Parlamento aki ta funciona!”
Cocolishi ta bolter di hende
Otmar a expresa cu e no por kere cu pueblo ta para aplaudi gobierno, mientras cu tin un nombramento sin fin y nunca antes bisto di posicion creativo. “P’esey nos a manda un carta tambe tocante e asunto di vacatura, formatieplaats unda cu awor ta bay nombra hende y ta habri solicitud pa pueblo. Nos kier wak esey, y cuanto hende a aplica y unda nan a publica e vacaturanan, paso nos no a wak esaki niun caminda publica. Pero si nos ta wak Cocolishi ta bolter over, cantidad di hende cu funcion cu nunca di nos bida nos a scucha y cu salarionan barbaro. Y esunnan cu ta traha mes y netamente cu nos mucha- y hobennan, no ta haya ni un cen preto. Nan mester bay yora na CEDE Aruba, pa wak si nan por bin na un proyecto pa haya subsidio”, Oduber a expresa
Boluntario ta traha y Parlamento ta cobra
Oduber a expresa un preocupacion serio riba e funcionamento di Parlamento: “Nos ta mira nombramento cu nos nunca a scucha prome, pero nos no ta mira ni un evaluacion di Parlamento mes. Como parlamentarionan bo ta gana 10 mil florin, pero hopi biaha pa no bisa hopi luna, nan no ta ni presenta na trabou, no ta papia, no ta produci. Pero e hende cu ta traha cu hubentud den e bario ta keda sin placa.”
Finalmente PPA ta pidi pa bin cu un evaluacion di e funcionamento di Parlamento den su 40 añanan di existencia. “Paso e ta mane un poppenkast, nan funcion ta pa sostene gobierno, gana 10 mil florin y tin biaha ni present ana trabou pa lunanan largo, no ta ni papia mes den reunion, no ta produci ni 1 carta ni pregunta, pero di otro banda, e Centronan di Bario no tin placa pero si pa inversionnan djis pa haci politica cu ne. No ta PPA bo ta perhudicando, sino e barionan, e pueblo y e futuro di Aruba”, Oduber a finalisa bisando.
