Diadomingo ta celebra Dia di Betico
ORANJESTAD (AAN): Secretario General di MEP, sr. Endy Croes, den nomber di MEP ta haci invitacion na henter Aruba pa nos celebra nos dia nacional Dia di Betico 25 di Januari proximo den grandi. E aña aki e tin un significacion mas aya comokiera cu lo celebra tambe 40 aña di e logro y lucha di Betico esta nos Status Aparte. Ban subi caya e recore rond Aruba bishitando tur eventonan riba e dia aki. MEP tambe a prepara un actividad grandi dilanti Cede di MEP na Sta Cruz.
Betico Croes a funda MEP 9 di Februari 1971 cu e miras pa lucha pa Aruba su Libertad y autonomia esta nos Status Aparte. Den e “Himno” di MEP cual a wordo lansa desde inicio di MEP na 1971 por tuma nota di e palabra nan “Uni den fila di MEP pa Aruba su Libertad” tambe un otro frase importante den e Himno “Hunto ta logra pa tur nos Status Apart”.
Loke kier ilustra cu Betico Croes a lanta MEP na 1971 y a percura pa e palabranan Libertad y Status Aparte ta ancra den e Himno. Esey tabata MEP su vision y esey tabata Betico su lucha y su determinacion. Despues di un historia y lucha largo Betico a percura pa unifica e pueblo aki. Betico a percura pa nos Himno y Bandera bira realidad 18 di Maart 1976. Betico y su Team a percura pa convence Hulanda den Ronde Tafel Conferentie 12 di Maart 1983 pa Aruba logra su Status Aparte. Palabranan historico cu Ruud Lubbers (def) Prome Minister di Hulanda a bisa riba e fecha aki “De Kogel is door de Kerk!” Despues di a lucha por a tuma nota con Betico ta e arkitecto constructor y realisador di nos Status Aparte y ta na e generacionnan nos dilanti pa percura pa cuida esaki manera un clompi di oro manera Betico mes a pidi.
Celebracion ta cuminza 10’or: Desde 10 or di mainta lo tin koffie morgen cu ambiente di caha di orgel. Desde 10 am lo inicia tambe un Torneo di mini futbol di edad 6-8 aña. Lo tin un exposicion henter dia parti paden audiovisual unda por mira videonan historico. Di 2-5 pm lo tin un torneo di domino. Alavez di 2-5 pm riba e stage grandi lo tin un programa cultural.
Atardi e bandanan Duro y Tsunami lo sera e actividad di 6-9pm. Tin 16 tent cu masha hopi cuminda y un variedad grandi. Alavez MEP tin su Rifa cu premio di 10.000 Florin cash cual sorteo lo tuma lugar 25 di januari pa 7pm. Reserva e fecha bo pasa celebra cu nos y percura cu bo liña ta na awa! Nos ta warda bo.
