Relaciona cu inseguridad den trafico:
- E ta pidi pa ley di trafico ta mas fuerte
ORANJESTAD (AAN) Parlamentario John Hart, di fraccion di AVP, a yama un “vragenuur” y despues tin un reunion cu ta sigui den Sala di Parlamento, tocante e tema di Seguridad den Trafico.
Den entrevista cu Matutino DIARIO, Hart a bisa cu locual ta importante, cu e por remarca, cu durante e vragenuur loke a resalta ta cu e Landsverordening Wegverkeer, pues e ley di trafico aki, lo mester yega na un sentido di cambio, pa loke ta trata castigo, na momento cu un persona tin cierto conducta.
“Nos tin cu wak tambe e comportacion, y mi ta kere cu e ley mester manda un señal mas fuerte. Esaki ta mi opinion. E ley tin cu ta mas fuerte, pa cambio di comportacion di nos automobilistanan”, Parlamentario Hart a señala.
Hart ta kere cu ta un decision un poco mas profundo, di con pa bay on mas cu otro den trafico.
“Por ripara merdia, con no tin pasenshi cu otro mas, mi no sa si ta e calor, pero seguridad den trafico mester ta un responsabilidad comparti, no ta ami so, pero abo tambe. Y e ta tambe Cuerpo Policial cu tin cu haci su trabao di ‘handhaving’. E ultimo dianan aki nos ta wak cu polis ta mas riba caya”, e Parlamentario a indica.
El a bisa cu durante e reunion cu e Minister e debate a wordo habri, y mester cuminza wanta otro responsabel y want’e skerpi.
“Y esey kiermen tambe sinta cu otro instancianan, actornan, manera rijscholennan, FADA, etc., y no tin nada bao di solo. E cosnan aki ta cosnan cu a wordo papia caba den pasado. Kiermen, mi ta kere cu nos mester ta un tiki mas conciente, cu e ta un responsabilidad comparti, ban tene otro skerpi. Tin un dicho cu bisa ‘hero ta mula hero’ ban mula hero cu otro, laga Parlamento tene Gobierno skerpi, Gobierno tene KPA skerpi, asina aki nos por preveni locual ta tumando lugar”, Parlamentario John Hart, a remarca.
El a reitera cu e señal den e ley mester ta mas fuerte, y esaki ta e discusion cu nan ta bay hiba.
Segun e parlamentario campaña di concientizacion mester ta na orden di dia. “Bo mester tin bon leynan, bon campaña di concientizacion y handhaving" Parlamentario Hart a enfatiza, reiterando riba presencia di KPA riba nos camindanan, ta algo hopi importante, y esey ta mustra tambe cu tin control. “Aworaki den tempo di carnaval, bo por ripara cu den nos cultura tin un tendencia cu ta hopi normal cu nos por bebe, papia na telefon tras di stuur, cu ta peligroso, y den combinacion cu alcohol, y velocidad halto e ta un mal combinacion”, Parlamentario Hart a remarca.
