MEP a presenta cambio di ley pa inclui cuido preventivo y salud mental den AZV

ORANJESTAD (AAN):  Fraccion di MEP a presenta awe na Parlamento di Aruba un proposicion di ley pa cambia e ley di AZV,

Landsverordening Algemene Ziektekostenverzekering. Cu e proposicion aki, MEP kier pa cuido preventivo y cuido di salud mental wordo inclui explicitamente den e pakete basico di AZV.

            E proposicion ta duna un base legal pa AZV cubri entre otro programa di screening, intervencion pa promove salud y yudansa psicologico. Cu esaki, MEP ta tuma un paso importante pa logra un sistema di salud mas sostenibel y humano, cu ta pone enfasis riba preveni en bes di cura.

            “E presion riba nos sistema di salud ta sigui subi, y e gastonan tambe. Inverti den prevencion ta e unico manera pa mantene cuido pagabel y accesible,” segun e iniciadornan di e ley: Señora Evelyn Wever-Croes, Señora Shailiny Tromp-Lee, Señor Dangui Oduber y Señor Rocco Tjon. “Ademas, nos no por sigui neglisha e salud mental di nos comunidad. E cambio di ley aki ta reconoce cu bienestar mental ta mes importante cu salud fisico. Awor cu tin espacio financiero, mester amplia e cuadro di AZV cu e dos areanan aki.”

            MEP ta haci un yamada na tur fraccion den Parlamento pa duna sosten amplio pa e proposicion, den interes di salud publico.