ORANJESTAD (AAN): Segun Clifford Heyliger di Partido AVP, cu asombro el a tuma nota di e postura arrogante di algun ministro di e gobierno actual.
Un postura anti democratico cu ta mina e libertad di expresion cu ta garantisa den nos Constitucion. Un politico ta na servicio di comunidad pesey e actititud anti democratico ta robez ariba tantisimo nivel cu mi no sa mes unda pa cuminsa. Pero ban purba di signala un par di nan.
Nada nobo: Minister Rocco Tjon y minister Endy Croes ta actua manera loke ta nan ta haci ta un novum pero en realidad e no ta nada nobo. Nos tin granel di ehempel rond mundo.
Na China pa decada caba tur loke ta worde publica mester di aprobacion di gobierno comunista Chines y tur cu ta opone e gobierno of tin ideologia cu ta contrario na esun di gobierno chines ta woro persigui, censura y/of encarcela.
Otro ehempel cerca di cas. Presidente Maduro a persigui y encarcale tur esnan cu ta opone su maneho. Canal di television a worde cera of censura, periodistra y oponente nan politico a worde aresta y encarcela.
Un mas actual ta esun di Russia. Presidente Ruso Vladimir Putin a dicidi di ehecuta su plan di espansion invadiendo Ucrania. Pa evita reaccion den su pais Putin a traha un stroria y a convence e poblacion especialmente e massa cu ta biba den area nan rural. Su exito ta depende di su control di loke medio di comunicacion ta publica (loke e pueblo ta haya pa wak y scucha).
Tapa iregularidad: Ta dificil pa haci cos nan cu no mag di wak luz di dia si constantemente prensa ta expone bo acto nan. Pesey pa gobierno e ta di sumo importancia pa silencia prensa, ataca contricante nan politica riba un nivel personal y baho. Pueblo no mag di sa cu e fiesta di Friends and Family ta sigui.
Nos minister actual ta mustrando nan arrogancia y falta di humildad cu nan actuacion. Ta parce cu e gobernante nan actual y nan parlamentario nan di MEP/Raiz ta lubida cu nan tey pa sirbi e interes di e Pais Aruba. Ta minister kiermen cu bo ta un representante di pais cu ta encarga cu maneho di pais. Un minister igual cu un parlamentario ta un sirbido di e pueblo.
Hipocresia: Minister Rocco Tjon a declara cu tanten cu un website local su nivel di periodismo no drecha e no ta duna ningun entrevista. Mi pregunta na minister Tjon: “ E mesun standard ta aplicabel pe e medio di comunicacion cu to pro MEP cu ta lustra y hasta menaza prensa?
Parlamentario nan ta yena nan boca cu e frase Parlamento ta e organo di mas halto den e Pais. Pero e realidad ta otro. Nos ta wak cu 11 Parlamentario ta permiti Minister nan haci y deshaci.
Minister Rocco ta actua manera un mucha mal cria cu no ta hayando su kier. Tur esaki mientras tin drive by shooting y yen di problema nan social. Minister Rocco ta scohe pa tapa wowo y purba gaña pueblo cu crimininalidad y situacion social a mehora.
