ORANJESTAD (AAN) – Parlamentario Ricky Hoek a hiba palabra den conferencia di prensa di Gobierno,
y a referi na Parlamentario Mervin Wyatt-Ras, cu a mustra desapunta cu den cinco aña no a ehecuta e Ley di Crèche, cu a ser aproba na aña 2017.
Parlamentario Hoek a bisa cu esaki ta completamente eroneo; el a indica cu e tin un “time line” cu desde 1998 e ley a keda trata y a cuminza traha riba dje.
Den e “timeline” por wak cu desde 2015 a sali un rapport di SER, den cual ta bisa cu gobierno ta bin cu implementacion di e Landsverordening Kinder Opvang, pa por regula e operacion di calidad di cuido den Centronan di Cuido di Mucha.
Hoek ta asumi cu Parlamentario Wyatt- Ras ta bin cu e tema aki debi na e incidente lamentable cu a sosode luna pasa unda un baby a fayece.
“Pero nos kier a recorda señora Wyatt-Ras cu desde 2027 hopi a wordo haci pa e departamento di hoben y mucha y pa recorde tambe cu desde 2001 pa 2021 hopi proyecto a wordo haci”, e parlamentario a relata.
Parlamentario Hoek a agrega cu desde September a reuni cu DTI pa loke ta e seguridad di crèche of centro di cuido di muchanan. Cinco grupo a haya e curso EHBO CPR y esaki a sigui complementa door di añanan, unda cu 173 persona, lider den cuido di mucha a haya e curso aki.
Na October, finalmente, a traha e Ley di Kinderopvang, y akinan tambe a haci un ronda di consulta cu tur e centronan di cuido pa yuda y duna nan e formacion cu nan mester. Tin un opleiding cu tambe e lidernan ta hayando hunto cu e centronan di cuido y esaki ta bayendo hopi bon, Parlamentario Hoek a remarca.
“Actualmente, den 2022, FEPA a start un estudio pa un total di 58 cabesante di Centro di Cuido di Muchanan. Na Februari nan a sigui traha e Ley pa haci e bira un realidad mas pronto posible, y nos por wak cu ta sumamente importante cu nos ta pone atencion na e centronan di cuido di much” Hoek a bisa y a indica cu lo sigui duna informacion tocante e tema aki.
