E ta lamenta cu oposicion a vota contra:
ORANJESTAD (AAN) – Den conferencia di prensa di fraccion di MEP, Diaranzon di e siman aki, Parlamentario Marco Bislip a hiba palabra, y a referi na e tema di integridad, den e contexto di un mocion cu el a presenta.
Dia 5 di April, cu tabata ultimo dia di tratamento di presupuesto 2022, Berlis a presenta e mocion # 40 cu ta pa introduci integridad den Parlamento.
Como parlamentario nobo, un di su pasionnan ta pa wak structuranan cambia, pa tin mas transparencia y integridad, no solamente den gobierno pero tambe den Parlamento.
“Nos por corda cu na December 2021, nos a pasa e Ley di Integridad pa candidato y ministernan, pero durante e tratamento di presupuesto 2022, mi a entrega e mocion aki. Pasobra ora mi a wak na December cu e pueblo a cuminza duna comentario tocante ken ta controla esnan cu ta controla gobierno, mi por a wak manera un clamor den pueblo cu tambe kier a wak seriedad, transparencia y integridad den e Organo di mas halto cu ta nos Parlamento di Aruba, y naturalmente, mi a responde e dia ey”, Parlamentario Marco Berlis a señala.
Un di e aspectonan cu e mocion aki ta menciona, cu ta dicidi pa dentro di corto tempo Parlamento percura pa concipia un ley di iniciativa, cu ta adresa miembresia di Parlamento relata na asuntonan penal, pa asina salvaguardia su imagen.
E parlamentario a splica pakico el a trece esaki dilanti. “Pasobra ta asina importante pa nos tin integridad tur caminda. Mi ta kere cu e ta un palabra hopi uza hasta ‘sobre uza’ pasobra di un manera of otro, hendenan no ta para tras di e palabra aki, pero mi ta kere cu ta importante pa esaki cuminza cambia”, Marco Berlis a expresa.
Berlis a agrega cu pesey e ta lamenta profundamente, cu apesar cu el a trece un bon mocion dilanti, un cu ta urgi nan bin hunto como Parlamento, parlamentarionan sinta na mesa y pensa hunto con nan por ensambla un ley cu ta bay asegura cu nunca mas Parlamento lo keda na berguenza, of pasa den cosnan cu no ta corecto y cu ta haci cu Parlamento no ta integro mas, e mocion a wordo benta abao door di oposicion, cu a vota completamente en contra.
“Loke mi kier subraya y remarca, ta cu ora a yega e momento pa haci ‘stem motiveren’ ningun hende di fraccion di AVP a duna comentario. Nos por a wak señor Mansur di Accion 21, cu a core defende tur esaki y a trata di bin cu cierto argumentonan. Lider di MAS tambe a vota contra sin bisa nada. Pesey di akinan mi kier bisa cu si tin argumentonan mes, e idea ta pa nos sinta traha hunto, y haci esaki algo posible pasobra pueblo ta exigi pa nos como Parlamento zorg pa nos integridad semper ta briya, pa nos por ta transparente den nos trabao y pueblo por wordo representa dignamente tambe” Parlamentario Berlis a relata.
