Parlamentario Evelyn Wever-Croes
ORANJESTAD (AAN): Diamars anochi despues di un dia largo di reunionnan den Parlamento pa trata e ley di Reino di consensus di HOFA, Parlamentario Evelyn Wever-Croes a duna un recap di con e dia a bay. Na prome luga Wever-Croes a felicita y gradici e sindicatonan pa un tremendo exposicion di nan ponencianan y preocupacionnan, mustrando asina nan balentia y amor pa nan miembronan y pa pais Aruba. Sigur un momento na unda miembronan por ta orguyoso di tin lidernan asina pa representanan.
Parlamentario Wever-Croes a expresa cu e acto di sindicatonan aki ta un muestra cu no ta solamente fraccion di MEP y PPA ta contra sino tambe e sindicatonan. Pa cu esaki, Parlamentario Wever-Croes a haci e pregunta na Prome Minister Eman, cu mirando cu no ta solamente oposicion ta contra sino mas hende di su pueblo, no ta momento pa e para un rato y recapacita? E profesor a recomenda pa na momento cu bo ta bayendo den un mal direccion, ta miho pa bo para bay back, enbes di sigui den e direccion ekiboca, y esaki ta hustamente loke fraccion di MEP a pidi Prome Minister Eman.
Durante e reunion señor Mike de Meza y mas parlamentario tambe a expresa di no ta sostene e ley aki, resultando asina cu e coalicion a bay hopi kibra y sin argumento. Nan a sconde un biaha bou saya di MEP cual ta indica tambe cu nan mes no ta sostene e ley aki.
Parlamentario Wever-Croes a indica tambe cu e nivel den Parlamento tabata uno hopi baho cu atakenan y nombramento di nombernan mahos contra su persona. “A pesar di e nivel aki, mi tin hopi speranza den mi curason, paso mi sa cu tin hopi hende cu ta stima Aruba, y esaki ta dunami e speranza cu e ley aki no ta bay drenta na vigor” Wever-Croes a expresa.
Actualmente Gobierno no tin consensus pa cu e ley aki, y nan no a haya esaki durante e reunion den Parlamento tampoco. Mas pio ainda ta cu nan no tin consensus entre e ministernan paso ni e papel mas importante cu ta e decision di ministerraad, prome cu Minister Gerlien Croes of Prome Minister Mike Eman a entrega na Hulanda, nan no tin. Esaki ta un error sumamente grandi cu ta mustra cu desafortunadamente Aruba ta conta cu un gobierno con cu ta, di ken cu ta, y cu ta haci kico cu ta.
