Parlamentario Xiomar Maduro:
- Loke a pasa den e reunion publico di Rijkswet HOFA
- Gerlien a splica pueblo nada di proceso y consecuencia
ORANJESTAD (AAN): Na opinion di Parlamentario Xiomara Maduro di MEP, pueblo ta hopi desapunta den Minister Gerlien Croes. Sigur despues cu porfin a yama e reunion publico den Parlamento pa Pueblo haya mas informacion riba e Rijkswet HOFA y ta mira con nos Minister di Relacion den Reino, Gerlien Croes, a tuma tur su tempo den primera tanda di contestacion pa haci politikeria y culpa tur hende. Gerlien ningun rato a pensa cu un grupo grandi den Pueblo ta fada di politikeria barata, y netamente tabata wardando pa tende su splicacion riba e proceso, e contenido y e consecuencia di e Rijkswet HOFA
No a splica proceso: Tabata echt un desapunto pa mira cu Minister Gerlien no a tuma ni sikiera un rato pa splica e contenido di e ley y e articulonan mas importante den e ley.
No a splica nada di e proceso pa hinca e concepto di ley den otro y tampoco a splica di con a djies manda e concepto pa Rijksministerraad, sin informa prome Parlmento cu ta un organo di Pueblo di Aruba.
No a splica contenido: Gerlien no a splica nada di e contenido di e conseho di IMF riba normanan financiero y su relevancia y importancia pa locual ta e concepto di ley, pero tambe pa e supervicion financiero existente na Aruba den e ley local di LAft.
E mandatario no a bisa nada di con nan a desvia di locual IMF a conseha pa tene e normanan simpel. Mas lamentable ta cu Gerlien a keda keto riba e mocion cu e mesun Parlamento cu el a forma parti di dje a exigi, pa e Rijkswet no mina autoridad di Parlamento, pa refinancia debe biew di Aruba y pa percura pa un duidelijke exitbepaling.
Awe ningun di e 3 puntonan aki a tene cuenta cune, pero Gerlien no ta splica nada. Por ehempel, e exitbepaling ta conta cu 20 punto pa Aruba sali afo di e Rijkswet HOFA, pero ni sikiera un di nan Gerlien por a splica Pueblo pa nan sa kico ta significa den practica y cuanto aña Aruba lo tuma pa por cumpli cu cada exigencia.
Pueblo ta desapunta den Gerlien: Djies mira cuanto informacion importante, Minister Gerlien no a duna Pueblo. E minister a prefera pa tuma tempo balioso pa haci politikeria pa lastra y culpa tur otro hende, sin asumi responsabilidad, ta realmente transparante, y mas cu tur cos, ta husto cu Pueblo pa informa nan debidamente.
Pueblo echt a keda hopi desapunta den Minister Gerlien Croes su actuacion bou nivel den e reunion publico di Rijkswet HOFA.
