Parlamentario Shailiny Tromp-Lee:
- Ya caba dos luna a pasa
ORANJESTAD (AAN): Na opinion di Shailiny Tromp-Lee di MEP, ta realmente incomprendibel cu despues di dos luna, e fraccion di AVP ainda no por fiha un posicion cla riba e Rijkswet pa Houdbare Overheidsfinanciën Aruba (HOFA). E pueblo di Aruba ta merece sa kico ta loke berdaderamente e fraccion di partido mas grandi di coalicion ta pensa riba un tema asina fundamental pa autonomia y responsabilidad financiero di nos pais.
Ta cla cu partido Futuro, durante campaña, a para abiertamente pa un rijkswet, promoviendo un modelo di control financiero for di Reino. Pero AVP, cu su largo historia y trayectoria politico, nunca a sostene esei. Den pasado, e partido semper a defende cu Aruba mes mester tene e control riba su propio finanzas, sin dependencia di Hulanda.
Awor, cu AVP ta den gobierno hunto cu Futuro, e situacion ta otro. Ta parce cu pa mantene e coalicion riba pia, AVP ta keda baha cabes, lagando su principionan un banda y ta bay di acuerdo cu e direccion cu Futuro kier bay, esta aproba Rijkswet HOFA. Esey ta un escogencia di gobierno — pero e fraccion di AVP mes ainda ta sin palabra, despues di dos luna repasando y analisando. Nan ta pro, of nan ta contra?
E silencio aki ta incomprendibel y ta manda un mensahe cla: Futuro ta stipulando direccion, y AVP no tin curashi pa lanta pa su principionan mas basico. Fraccion di AVP mester realisa cu pueblo completo ta scucha y wak. Nan a scucha De Meza cu si a para pa e principionan cu semper nan partido pa para p’e. Ta bon pa nan realisa cu un partido cu ta perde su bos den gobierno, ta perde su credibilidad na pueblo.
Aruba mester liderato di palabra, no silencio cu temor.
