Parlamentario Evelyn Wever-Croes:
ORANJESTAD (AAN): Diamars a tuma luga den Parlamento di Aruba e reunion publico cu Fraccionnan di MEP y PPA a solicita pa Gobierno duna cuenta di e rijkswet HOFA. Den su discertacion, Parlamentario Evelyn Wever-Croes a dirigi su mes na pueblo di Aruba enfatisando cu tin momento den politica cu mester pone diferencianan politico un banda y para hunto irespecto di color politico, pa defende pais Aruba.
Parlamentario Wever-Croes a expresa cu e reunion di diamars no ta trata ni di color politico, di rasa of di religion sino tocante Aruba y su bienestar. No ta trata tampoco di ken a firma kico pasobra tur prueba di ken y kico a wordo firma ya ta riba mesa. El a expresa si, cu na 2024, el a firma un “Bestuurlijk Akoord”, un acuerdo administrativo. Esaki ta un intencion politico (manera un letter of intent) entre partidonan pa por yega na negocia un rijkswet.
E parlamentario a expresa cu e documento di tres pagina aki cu el a firma na aña 2024, segun opinionnan legal di profesornan na Hulanda y di profesionalnan di Aruba, no ta mara ni Gobierno ni Parlamento. Por lo tanto, Parlamentario Wever-Croes a enfatisa, e argumento cu ta su persona a firma rijkswet ta for di luga y falso.
“Ningun hende cu ta tuma su mes na serio, por bisa awe cu ta Evelyn Wever-Croes a firma rijkswet Hofa. Y ningun politico por sigui ripiti esaki pasobra e sa cu esaki no ta berdad y ta varios professor di ley a confirma esaki”, Parlamentario Evelyn Wever-Croes a expresa.
