Parlamentario Carlos Bermudez:
ORANJESTAD (AAN): Miembro di Parlamento di partido AVP, Carlos Bermudez, durante e sesion publico di Parlamento di Aruba riba Diamars mainta, a presenta un disertacion den un tono cla y constructivo, cu su meta principal pa informa pueblo di Aruba cu transparencia y positivismo riba e tema di e proceso di Rijkswet Houdbare Overheidsfinanciën Aruba (HOFA).
Den su presentacion, Bermudez a aclaria cu awe no ta trata di acepta ni rechaza un Rijkswet, sino di sigui analiza e proceso cu ta canando. “E dia di decision final no ta awe,” e a enfatisa. “Nos mester warda e advies di Raad van Advies di Aruba y Raad van State di Hulanda prome cu parlamento por tuma un posicion final.”
E parlamentario a recorda cu riba 4 di juni 2024, e ex-Minister President a firma un Bestuurlijk Akkoord entre Aruba y Hulanda, cu tabata un compromiso formal pa traha un marco legal nobo, incluyendo un Rijkswet.
“Ora bo firma un acuerdo asina, bo ta mara bo mes. Bo ta compromete Aruba pa traha un Rijkswet,” Bermudez a bisa. “E texto mes ta cla: ambos gobierno a compromete pa traha e ley y promove su aprobacion parlamentario.”
Bermudez a pone den perspectiva cu e gabinete anterior, durante e pandemia, a tuma prestamo di Hulanda como “unico opcion” pa sobrevivi, pero despues den 2024, ora economia tabata den recuperacion, a prefera firma un Bestuurlijk Akkoord y negocia cu Hulanda, esey cu nan mes ta yama “pirata.” “Si bo ta bisa un hende ta pirata, pero bo mes ta sinta na mesa cu ne pa negocia 90% di un Rijkswet, esey ta hipocresia politico,” el a agrega.
E parlamentario di AVP a enfatisa cu gobernacion ta continuacion, y cu e gobierno actual a haya e proceso di Rijkswet “90% cla” di banda di e gabinete anterior. “Esey ta realidad: e proceso aki no ta un invento nobo, ta un continuacion cu a start bou di e gobierno anterior. Ta e gobierno actual cu ta sigui cu e mes profesionalnan pa finalisa e documento di consenso.”
Bermudez a pidi pueblo pa no laga nan gaña bo. “E tema di Rijkswet aki a start bou di e gobierno anterior. No sigui manipulacion politico, pero wak realidad di kico a worde firma na 2024. Nos relacion cu Hulanda ta serio, basa riba respeto y confianza, y mester sigui cu madures y responsabilidad,” el a conclui.
“Aruba mester para firme, no riba grito politico, pero riba transparencia, madurez y respet institucional.”
