Parlamentario Mike de Meza:
ORANJESTAD (AAN): Den e reunion publico di Parlamento diamars mainta, na unda cu Prome Minister Mike Eman y Ministernan Gerlien Croes y Geoffrey Wever a duna cuenta tocante e Ley di Reino pa Supervision Financiero di Aruba, manera cu a ser solicita pa Fraccionnan di MEP y PPA, Parlamentario Mike de Meza a expresa cu su posicion y opinion tocante e Rijkswet Hofa.
Den su disertacion señor de Meza a bisa enfaticamente cu e ta contra Rijkswet Hofa y semper e lo sali na fabor di autonomia y constitucion di Aruba. De Meza a indica tambe cu e ta contra e metemento di Hulanda pa forsa nan desicionnan riba Aruba. “Mi a huramenta pa na tur momento sali na defensa di autonomia di pais Aruba y na nos constitucion”, de Meza a enfatisa.
Parlamentario de Meza a lamenta cu ta trata un ley asina importante den apenas 20 minuut pasobra no por bay den e ley den henter su concepto. E ley aki, segun Parlamentario de Meza, ta mishi cu e nucleo di un lucha cu a tuma luga pa mas di 100 aña, e ta mishi cu e orguyo Arubiano, e ta mishi cu e posicion di Aruba den Reino, e ta mishi cu integridad y respet di Aruba, y e ta mishi cu autonomia di Aruba. “E rijkswet ta mishi cu un historia di mas di 100 aña cu nos grandinan a lucha p’e y logra na aña 1986”, Parlamentario de Meza a expresa.
Mas di 80 porciento di nos pueblo a vota pa nos autonomia, Status Aparte. E progreso di Aruba despues di esey tawata refleha riba loke cu nos antepasadonan a premira. Y a para pa e expresionnan manera “Baas den nos propio cas”. “Esakinan tawata luchanan fuerte y awe ta na nos pa defende. Ami ta para na banda di Aruba ora ta den discusion cu Hulanda sin importa cua gobierno ta sinta. Nos tur mester para hunto”, de Meza a enfatisa.
Parlamentario de Meza a enfatisa cu e no ta di acuerdo cu e postura di Hulanda pasobra mester trata otro como partners igual y e manera aki no tin su sosten. “Pa e Consensus Rijkswet aki pasa, e no mester tin e mayoria den Parlamento. E mester tin e aprobacion di e mayoria di e pueblo di Aruba. Pueblo ta esun cu mester tuma e decision y duna e mandato na Parlamento. Y esaki ta e unico forma cu ami por cambia di opinion. E unico cu por cambia mi posicion y acepta un rijkswet ta si mayoria di pueblo bisa mi cu ta e direccion ey mi mester bay”, Parlamentario Mike de Meza a enfatisa durante su disertacion.
