Parlamentario John Hart di AVP:
ORANJESTAD (AAN): Manera ta conoci, a cera un contract na 2021 cu Eagle LNG cu ta mara Pais Aruba pa 20 aña pa loke ta trata e transicion pa Liquified Natural Gas (LNG).
Segun Hart, pueblo di Aruba merece claridad riba un decision asina importante, pero ademas cu semper a nenga di ta transparente den e asunto aki, tambe ta parce cu e gobierno anterior su plan pa transicion di energia y tur e promesanan haci a bay pa olvido.
Esaki ta e punto cu parlamentario di Partido di Pueblo Arubano, John Hart a trece dilanti e siman aki durante un conferencia di prensa pa asina recorda na e ex-mandatarionan y actual parlamearionan di oposicion pa partido MEP cu nan si no lo pusha e tema bou mesa, pero lo apoya esfuerzonan pa pidi un investigacion tuma luga y purba libra Aruba di e deal desastroso aki.
Manera por recorda, e ex minister encarga cu maneho di energia, Glenbert Croes mester a retira di su posicion pa motibo di ta considera como sospechoso den e investigacion di e caso Portulaca. Fuera di esey, ta keda relevante pa haya claridad den e traspaso cu a tuma luga na Gabinete AVP-Futuro riba e maneho di energia.
Gobierno di Hulanda tambe a destaca e falta di transparencia den e deal di Eagle LNG basa riba un investigacion haci na 2024 riba e transicion di energia na Curaçao, Sint Maarten y Aruba y conduci pa TNO. Den e rapport a yega na conclusion cu ta confirma e falta di transparencia den e deal di Eagle LNG y cu e deal aki ta mara Aruba na man cu pia pa e siguiente 20 aña.
“Verdere verduurzaming van de elektriciteitsproductie in Aruba wordt beperkt door een recent afgesloten contract voor LNG. Er is weinig publiekelijk bekend over de leveringsovereenkomst voor LNG”, e rapport di TNO ta indica.
Den cuadro di esaki, Parlamentario Hart kier a comunica na comunidad cu esaki ta entre varios di e puntonan cu e y fraccion di AVP den parlamento lo ta atendiendo. Ta sinti cu esaki tabata necesario ya cu, ademas di nan propio seguimiento di e caso, ta un topico cu ta molestia y preocupa hopi ciudadano. Cu tur siguridad lo mantene e asunto aki den vigencia y te na su ultimo consecuencia.
