Eduard Pieters di PPA:
ORANJESTAD (AAN): Eduard Pieters di Partido PPA a splica, cu siman pasa e partido a ripara un consternacion atrobe di varios club cu ta huur e facilidad na Centro Deportivo Simeon Antonio. Ta trata aki mas di 10 club cu tin mas di 100 miembro cu ta practica diferente disciplina den deporte.
E motibo di e consternacion ta cu un club di gimnasia kier of a cera un convenio cu Fundacion Lotto pa Deporte despues di a consulta Minister di Deporte pa uzo structural di e facilidad. Cu e convenio aki, supuestamente nan por yega na remarca pa haya recursonan di un asociacion internacional di gimnasia, cu por yuda desaroya e disciplina aki na Aruba. Un desaroyo no desconoci den e otro disciplinanan aki na Aruba y esaki sigur por yuda e club di gimnasia. Loke ta straño ta di con e asociacion internacional aki ta yuda un club y no e asociacion di gimnasia di Aruba.
Di otro banda tin mas di 10 club cu ta representa mas di 100 miembro ta den incertidumbre. Nan no sa si acaso despues di 17 di April nan por sigui huur e facilidad aki. Nan no sa si acaso nan por duna lesnan na e hobennan di Simeon Antonio y vecindario pa haci deporte, movecion y recreacion. Nan no sa si acaso nan lo sigui co-educa e hobennan pa nan por ta mas disciplina y keda leu di maldad. Pasobra, un deportista mas, ta un delincuente menos!
E clubnan aki ta consisti di boluntarionan cu ta sacrifica nan tempo y hopi biaha placa pa yuda forma nos hobennan y yuda mantene e adultonan saludabel.
P.P.A ta boga pa stimula deporte como un actividad inclusivo. Esaki ta nifica cu tur mucha te cu adulto mayor, di tur status socio-economico y tambe personanan cu limitacion mester worde stimula pa haci movecion y deporte. Ademas tur esnan cu ta desea pa practica deporte mester haya e posibilidad y oportunidad igual pa haci esaki. Nos centronan deportivo rond di Aruba a worde crea pa varios gobierno den pasado pa por duna e oportunidad aki.
Ta p’esey P.P.A ta urgi minister encarga cu deporte, señora Gerlien Croes pa aclarea e situacion aki. Mantene un nivel di transparencia saludabel y no perhudica e deportistanan y e pueblo di Simeon Antonio en general. Door di dialoga cu e clubnan (y nan federacionnan) cu ta uza e facilidad y e club of federacion di gimnasia cu a haci e peticion pa su uzo, por mitiga e consternacion aki. Banda di dialoga, sostene, elogia y yuda e clubnan aki cu ta representa mas di 100 miembro di e bario di Simeon Antonio y vecindario pa nan por sigui haci movecion y practica nan deporte preferi structuralmente. Di otro banda ta bon pa Conseho di Gobierno yuda e club of federacion di gimnasia pa nan por haya e sosten internacional pa desaroyo di e disciplina di gimnasia na Aruba sin cu mester ocasiona ningun consternacion. E lo ta lamentable si Aruba perde e oportunidad aki pa falta di vision den deporte y no por soluciona e situacion aki.
