Carlos Bermudez (AVP):
ORANJESTAD (AAN): Pueblo ta bibando den temponan dificil y ta anhelando un solucion cu lo yuda nan cubri nan gastonan mensual y pa resta suficiente placa pa pone cuminda riba mesa.
Naturalmente pueblo mes mester yuda forma parti di e solucion.
Gabinete AVP-FUTURO a priminti (y a cumpli) di yuda nos pensionadonan cu un suma di 250 florin entrante 1 di mei 2025 y tambe a compromete pa baha accijns cu 10 cent riba cada liter di gasolin/diesel pa brinda alivio na tur automobilista.
Pasando den bario y ora papia cu habitantenan, bo ta ripara cu nan ta contento cu e inicio, pero cu ainda nan mester di algun ayudo mas, segun Bermudez.
Tumando na cuenta cu “Trece alivio pa gastonan esencial di pueblo y controla costo di bida, introduciendo un sistema integral pa mehora poder di compra” ta para como punto uno (1) ariba e lista di prioridadnan den e Plan di Gobernacion 2025-2028 (Pagina 4) Parlamentario Bermudez a puntra Minister di Finansa, Economia y Sector Primario lo siguiente:
Si Minister Wever por indica si a cuminsa caba riba e analisis anuncia riba pagina 33 di e Programa di Gobernacion 2025–2028, cu e meta pa determina e nivel di entrada cu lo sirbi como liña di pobresa na Aruba? Cual ta e fecha cu ta desea pa keda cla cu e Plan?
Si Minister Wever por indica si a cuminsa traha caba riba e plan “Plan Poder di Compra”, manera para riba pagina 33 di e Programa di Gobernacion 2025–2028? Cual ta e fecha cu ta desea pa keda cla cu e Plan? Ki tempo lo cuminsa implementa e plan?
Si Minister Wever por indica si a cuminsa traha caba riba e plan “Plan Reduccion Costo di Bida”, manera para riba pagina 34 di e Programa di Gobernacion 2025–2028? Cual ta e fecha cu ta desea pa keda cla cu e Plan? Ki tempo lo cuminsa implementa e plan?
Meta di e plannan ta pa yega na un formula cu por yuda personanan cu ya pa varios aña ta den un situacion precario. Motibo suficiente cu parlamentario Bermudez kier sa ki dia e plannan lo wordo ehecuta, pa nos ciudadanonan tin indicacion di ki dia nan por cuminsa sinti un poco mas alivio.
Bermudez sa cu e no ta facil pa cambia cosnan di un dia pa otro ni tampoco pa traha e plannan, pero di otro banda e kier mira e alivio den pueblo, e kier mira e sonrisanan riba cara di su pueblo.
Parlamentario Carlos Bermudez ta desea Minister Wever y su team tur clase di exito y ta warda riba e contestanan y muy en especial, e fecha di ehecucion di e plannan en cuestion.
