Lider di Partido MEP ta gradici tur esnan cu a asisti na e “Art Wine & Cheese Fundraising Event”

“Un danki di curason pa boso cooperacion, sin boso esaki no lo tabata posibel”

ORANJESTAD (AAN): Diasabra ultimo, lider di partido Movimiento Electoral di Pueblo (MEP) Evelyn Wever-Croes a organisa un “Art Wine & Cheese fundraising event” pa yuda recauda fondo pa su campaña electoral. Den un sala completamente yen, famia, amistadnan, conocirnan y sostenedornan a uni pa contribui y pasa un momento alegre cu e famia di MEP.

            Na yegada, den un sala bunita decora den e colornan di Aruba, invitadonan por a disfruta di e obranan di arte crea pa lider di partido, acompaña pa musica di violin toca pa Tracey Alders. Crea arte ta e manera cu Evelyn ta relaha y recarga pa asina e por sigui cu su labornan di tur dia, pues cada un di e obranan aki ta traha cu hopi amor y pasion.  

            Lider di partido a habri e anochi oficialmente dunando un bon bini na tur esnan presente y gradicinan pa e sosten duna na su persona. Despues a sigui un bunita poësia cu señora Ruthy Vrieswijk, mihor conoci como “Lady Ruth” a dedica na Evelyn, expresando palabranan di elogio y gratitud pa tur loke el a haci y ta haciendo pa e dushi baranca aki.

            Na su turno lider di partido a duna su discurso splicando un poco di con e hornada politico aki a cuminsa pa su persona. El a indica cu e meta principal pa drenta politica ta paso e kier a haci un diferencia, pero mirando awe tur loke el a logra, ta hopi mas di loke e por a pensa cu e lo logra. Su persona ta e prome ser femenino pa bira Prome Minister di pais Aruba, y apesar cu e reto aki no tabata uno facil, el a sa di  goberna e pais aki di e miho manera den bon tempo y mal tempo. Na final di su discurso, lider di partido a tuma e oportunidad di gradici tur esnan cu di un of otro manera a yuda haci e evento aki uno exitoso.

            Pa cera e anochi aki, invitadonan presente a goza y baila riba e musica di Grupo di Betico cu a bin trece un ambiente di fin di aña. Cada integrante di e grupo aki, cu nan talento enorme, y un curason grandi a sa di trece un ambiente spectacular, pa crea asina momentonan inolvidabel di e anochi aki.

            Lider di partido ta gradici tur esnan cu di un of otro manera a yuda na haci e anochi aki uno hopi special. Tambe e ta gradici tur su famia, amigo, conocirnan y sostenedornan pa nan sosten y compromiso pa cu su persona y pa cu partido MEP. “Ta solamente uni como famia, nos por lucha pa sigui hiba nos pais padilanti. Un danki di curason pa boso cooperacion. Sin boso esaki no lo tabata posibel” Lider di partido a expresa.