Jennifer Arends- Reyes #6 AVP
ORANJESTAD (AAN): “Nos ta dilanti un periodo decisivo pa e futuro di Aruba unda cu abo como ciudadano biba riba e isla aki tin cu bay eherce bo derecho di voto. E voto cu lo bay marca e futuro di nos pais y pa cu nos futuro generacion.” Esey ta loke Jennifer Arends-Reyes di Partido AVP a trece dilanti den e siman nobo aki.
Aruba su unico pilar economico, nos turismo! E no ta un secreto cu nos unico pilar di economia ta creciendo y Aruba ta manteniendo cifranan di bishitante fuertemente, haciendo Aruba un destinacion gusta pa nos bishitantenan. Pero kico esaki ta significa pa e clase trahador. E aumento di turismo no ta refleha back den e entrada di e clase trahador.
Den ATA su ultimo rapport di September 2024 ta indica cu Aruba a ricibi un total di 1.082.471 bishitante te cu awor pa 2024, cu ta un aumento di 16.4% compara cu September 2023. Cu e cantidad di bishitante aki, nos por lesa tambe un estadia di mas cu 7 dia riba nos isla. Un balor di compra di Afl. 4.671 miyon cu a worde laga atras aki na Aruba den 2023, cual ta un aumento di 13.5% compara cu September 2022. Kico e data aki ta bisando y ta refleha, cu Turismo a conoce un aumento pero tambe 13.5% mas a worde gasta na Aruba. E gastamento pa persona ta worde rapporta pa Centrale Bank a base di transaccionnan via carchi di credito.
Cu e yegada pronto di 3 hotel mas aki na Aruba, nos por premira riba aun mas crecemento y gastamento positivo, pero esaki lo bay refleha den e cartera di nos trahadornan e ngeneral den sector turismo? Nos mester para pa un turismo cu prosperidad pa cada un trahador caminda cu e servicio no lo worde perhudica pero amabilidad lo worde aprecia y recompensa. Nos trahadornan den sector di turismo mester por mira y biba e ‘turismo fuerte’, nos mester por sinti e aumento di e 13.5% den nos propio cartera. E no ta husto pa tin un turismo cu crecemento pero e clase trahador no por tin e poder di compra, pero si ta cumpli pa presenta na pia trabao y traha cu e mesun amabilidad y cordialidad di semper cu Aruba ta reconoci pe.
A yega tempo pa awor si nos cuminsa pensa riba un turismo di calidad pero cu menos impacto riba nos miedo ambiente. Trece e turista cu ta stima y respeta Aruba, esun cu ta balora y conserva locual cu nos tin. E cuido di nos medio ambiente ta den nos man. A otorga permiso na varios hotel pa worde construi aki na Aruba premirando un crecemento di nos economia como prioridad pero esey a costa cu nos medio ambiente a perde gran parti di naturalesa. Eta un hecho cu nos no por hala atras, pero si nos por move bay dilanti cu un pensamento positivo y yuda conserva locual cu si nos tin ainda.
Turismo ta Nos! Un voto pa Jennifer ta un voto pa trece un cambio y duna prosperidad back den e trahadornan cu ta labora incansabelmente den e sector di turismo pa duna e bishitantenan un experiencia inolvidabel.
