Lider di Partido MEP a gradici Noord pa encuentro exitoso ‘Ban Topa’

ORANJESTAD (AAN): Diahuebs anochi, Partido Movimento Electoral di Pueblo MEP, a organiza e famoso evento di "Ban Topa" den bario di Noord, pa asina por duna informacion, y alavez scucha di e ciudadanonan tur nan preocupacionnan.

   Presente na e evento aki, tabata lider di partido Evelyn Wever-Croes, hunto cu su coleganan di partido, Dangui Oduber, Shailiny Tromp-Lee, Ricky Hoek, Darlaine Guedez-Erasmus, Edgard Vrolijk, Alvin Molina, Marco Berlis, Rodymar Geerman y Hendrik Tevreden. E tabata un anochi sumamente exitoso, na unda tabata tin un sala yen di persona, cla pa scucha tur loke partido MEP, tabata tin di comunica.

   E anochi tabata uno yena di informacion, na unda Shailiny Tromp-Lee y Ricky Hoek a duna un splicacion extenso di tur nan trabaonan como Parlamentario, sigui pa Dangui Oduber cu a duna informacion riba turismo y salud. Como clausura, lider di partido a duna un discurso, splicando e retonan cu Aruba tabata tin y e actual recuperacion.

   Durante su discurso, lider di partido MEP, Evelyn Wever-Croes a elabora riba e efectonan devastador cu e pandemia tabata tin riba pais Aruba. Tambe, el a expresa, cu mescos cu IMF a indica, cu Aruba ta un di e paisnan mas afecta pa e pandemia, awe nan ta bisa cu Aruba ta e pais cu tin e recuperacion di mas impresionante. Esaki sigur ta danki na e trabao grandi cu Gobierno a bin ta haciendo. Specialmente riba e sector turismo, cu ta e pilar mas grandi di e economia di Aruba.

    Lider di partido a pasa riba varios logro di Gabinete Wever-Croes II, cu ta di admira y aprecia. Turismo ta subiendo yegando nivelnan mas halto cu prome cu pandemia, desempleo ta bahando, Aruba lo sera aña cu un porcentahe di inflacion mas abou cu tabata premira, finanzas publico ta positivo, a logra sera e presupuesto cu un surplus, proyectonan di innovacion a trece resultadonan positivo pa varios scol, dunando e scolnan ganador, materialnan digital pa haci e sistema di educacion mas atractivo, inversion den deporte, Compleho Deportivo Guillermo Prospero Trinidad ta den su fase final di renobacion, pa cu e area social a crea un "Family Justice Center", cu lo ta atende casonan di abuso sexual, y ta invirtiendo den e area di Energia pa asina crea un otro pilar economico pa pais Aruba.

  Por ultimo, lider di partido, a expresa cu e ta sumamente orguyoso di e logronan di partido MEP, y cu unda cu e bay representa Aruba, semper e paisnan ta elogia tur loke Aruba a logra den e ultimo añanan. Tambe, el a indica cu, nos no ta, na unda nos mester ta, pero cu nos ta riba e bon caminda, y cu su compromiso, y e compromiso di e partido MEP, ta pa mira e progreso y bienestar den tur hogar aki na Aruba.