Entrevista cu Parlamentario Hendrik Tevreden:
ORANJESTAD (AAN): Fraccion di MEP tambe a conoce un Lider di Fraccion nobo den persona di Hendrik Tevreden.
Sr. Tevreden, for di 2017 a bira Parlamentario durante Gabinete Wever-Croes I y actualmente, cu Gabinete Wever-Croes II, el a asumi e posicion di Lider di Fraccion di MEP, despues cu su colega Parlamentario Shailiny Tromp-Lee no por a continua pa motibonan personal.
Hendrik Tevreden a crece den e bario di Dakota. El a studia Enfermeria y despues a specialisa su mes den Enfermeria Social-Psikiatrico pa asina duna ayudo profesionalisa na esnan cu adiccion. Diescinco aña di su tempo el a dedica na yuda esnan den adiccion y problema mental.
"Mi por conecta hopi bon cu esnan cu tin e problema di adiccion, mirando cu mi a crece den un situacion similar unda cu mi a mira e fenomeno aki hopi cerca den mi cas, con adiccion por destrui un famia. Danki Dios cu E a warda mi di e vicio ey di adiccion. Pero, si m'a mira hopi amigo di mi, conocirnan di mi cu a pasa den esaki. Mi ta kere pesey m'a haya asina un pasion pa yuda hendenan cu ta den e problema ey", a declara.
Actualmente, den politica y den e posicion di Lider di Fraccion di MEP, e ta confronta retonan nobo y el a duna di conoce cu su vision ta pa como fraccion nan por sigui representa pueblo di un manera digno, pero tambe vocifera nan preocupacion como profesional, no solamente den sala di Parlamento, pero den gobernacion en general. "E idea ta pa cada un, pasobra nos ta nuebe den fraccion, pa cada un di nos, cu tin diferente 'background' por concentra ariba nos metanan como individual profesional, y tambe logra e metanan comun cu nos ya a stipula ora cu nos a drenta Parlamento como fraccion", a bisa.
Con por haci esaki? Door di logra keda uni, keda comunica y keda pone Aruba prome. E linea ta pa den e proximo dos añanan cu falta, completa e vision cu nos a fiha na comienso y pa esaki cada miembro di fraccion tin di yuda carga pa nos por logr’e pa Aruba y e totalidad. "Mi meta principal ta pa purba na empuha coleganan pa logra mas cu por di nan potencial. Mi ta kere cu ora bo ta lidera e ta bon pa bo no ta e prome, pero e ultimo. Dicon? pasobra e ora bo tin e oportunidad pa empuha e otro pa logra su meta y asina como lider bo ta logra parti di bo meta tambe. Si bo team logra, esey ta parti di bo logro", a declara.
Sinembargo, el a splica cu e sa cu no ta algo facil, pasobra ta trata akinan di un grupo di hende cu pensamento y ideanan diferente. Y cu semper nan por opta pa no sigui den union. Pero no ta algo imposibel ora cu nos keda pone e deseo pa e miho pa nos pais como mision prome.
E secreto pa tin exito como ekipo ta di sigui tin un bon comunicacion, sigui ta transparente cu otro, pero tambe honesto. Pesey tur momento e ta purba y ta continua pa ta habri cu su coleganan y splica nan cu parti di su tempo, tumando e responsabilidad di lider di fraccion, ta pa guia y yuda nan alcansa nan metanan cu nan kier mira realisa pa Aruba.
El a finalisa bisando cu e resto di e tempo ta pa e por logra su propositonan como representante di pueblo, y e grupo-meta cu kier mira avansa mas, esnan den adiccion y problemanan social.
