Lider di Partido Lucha pa Reforma a introduci cada un di e candidatonan riba su lista

Durante un rueda di prensa:

ORANJESTAD(AAN) — E Lider di Partido Lucha pa Reforma, señor Rycond Santos Do Nascimento, den conferencia di prensa a introduci pa pueblo di Aruba, e siete candidatonan cu lo compañ'e den e contienda electoral, dia 6 di December proximo.

            El a cuminza pa nombra cu Frances Malca Caceres, cu a scucha e lider hopi biaha papia di e falta di maneho di desperdicio. E prome persona cu a pone e tema aki riba radar personalmente p’e ta Malca. “E tabata un studiante ainda na Universidad di Aruba y tabata skirbi su screptie riba e tema, introduciendo tur e problematica aki y di e tempo ey caba, mi ta sumamente orguyoso cu un hoben hurista, a tuma e paso y curashi di a para pa nos pais, na e momento aki”, Santos Do Nascimento a expresa.

            Rene Wild, cu no ta un cara desconoci, no solamente e ta un personal trainer pero e ta un nutricionista, un persona hopi stima den nos comunidad, y e ta kere cu no tin un persona cu conoce Rene, cu ta bay nenga cu Rene tin un pasion pa un estilo di bida saludable, aki na Aruba. “Nos mester tin un perspectiva a largo plazo tambe pa loke ta nos salud”, Santos Do Nascimento a señala.

            Dionne Jie Sam Foek, tampoco ta un cara desconoci na Aruba. E tin background den turismo y hospitalidad, pero su pasion ta, principalmente, den e area di comunicacion. “Nos a wak cu hopi biaha gobierno ta faya den e parti di comunica na tempo. Nos a wak hopi biaha gobierno ta faya den e parti di comunica na tempo. Pa bay back riba e cuestion di falta di maneho di desperdicio, nos a wak e forma con dump a wordo cera; ora bo core rond di Aruba bo ta wak cu tin sushi tur caminda. Tin falta di comunicacion y ey ta su area di experticia y su pasion”, Santos Do Nascimento a relata.

            Vivian Parejo-Lacle ta e persona cu mas ta conoce Rycond desde chikito. E tin un pasion pa hubentud, y e pasion ey ta te awe. “E ta traha den enseñanza, e ta docente na EPB y mi ta sumamente contento cu nos tin docente tambe den nos team, pasobra enseñanza ta hopi cerca di mi curazon, y e ta e solucion berdadero, pa loke ta pobreza”, lider di LpR a remarca.

            Tin tambe Yulieth Roos, cu ta un persona naci na Colombia, naturaliza cu passport Hulandes. El a bisa cu semper amistad di su famia cu famia Latino tabata grandi. “Mi ta kere cu mester pone dignidad di cada persona riba un pedestal, den e pais aki”, Santos Do Nascimento a señala.

            Michael Lopez, ta un persona cu Rycond Santos Do Nascimento ta conoce mil aña caba. Asina el a expresa. Y prome cu el a bay traha na Universidad di Aruba, el a traha cu señor Lopez y semper nan a keda den contacto. “Mi tin recuerdonan masha bunita ora mi a traha bao di señor Lopez y e ta hopi orguyoso cu e ta forma parti tambe di e team, riba e parti huridico”, Rycond Santos Do Nascimento a menciona.