Parlamentario Berlis: Sevinger den caso di labamento di placa den corte
ORANJESTAD (AAN): Februari 2025 Benny lo para dilanti hues pa labamento di placa. Ministerio Publico a haci un investigacion y a cuminsa un caso na Mei 2024 pa kita 940 mil florin for di Benny Sevinger. Hues a pospone e caso aki pa 21 di October 2024. Fiscal a presenta e investigacion cu ta bastante amplio, y a splica hues cu e rapport aki a wordo usa efectivamente contra Benny den Corte Superior. A keda stipula pa hues cu pa 28 di februari 2025 lo trata e caso di labamento di placa den corte. Esaki ta otro sla mas pa AVP y un caso mas den cual Sevinger lo mester duna cuenta dilanti mesa berde. Mientras tanto Mike ta sigui permiti Benny den Parlamento.
Mike ta insisti pa elogia un politico condena
Algun siman pasa e lider di partido Mike Eman a elogia Benny publicamente na Cas di Partido durante un celebracion, aunke 3 hues a condene pa fraude, soborno pasivo, abuso di funcion y ladronicia; y a bisa “Benny Sevinger a pasa e sentimentonan di sirbi e pais ki, e sentimentonan di carga Aruba, manera el a haci den su añanan di servicio, e sentimentonan di Rancho y Madiki!” Mi pregunta na Mike Eman ta: “di ki manera Benny a sirbi e pais aki? Di ki manera Benny a carga e pais aki? Benny a viola y horta e pais aki, a bende patrimonio di pueblo pa probecho di su amigonan y su mes y ainda Mike Eman tin palabranan di elogio p’e? E ladron a bira un heroe awo?
Segun Benny e ta “Etico awo.”
Den un otro rueda di prensa di AVP algun siman pasa, Benny a sugeri cu e lo “por” sigui riba lista di AVP y bay eleccion, sinembargo e ta haya cu esaki no ta algo “etico,” mirando e condena cu ta colga riba su cabes. E pregunta pa Benny e ora lo ta; “Acaso na 2021 bo no tabata un sospechoso di corupcion, sinta den KIA? Acaso na April 2023 bo no a wordo condena pa Corte den Prome Instancia?” Unda bo etica a keda e tempo ey? Kiermen, awor cu ba “bira etico” bo ta bay retira tambe di Parlamento di Aruba? Etica ta algo cu sigur no ta existi den bo bida!
AVP: “Brasando, Celebrando y awo Campañando cu corupcion!
E realidad di e estado y condicion di partido AVP ta keda confirma a traves di e declaracionnan di Benny Sevinger; “Mi lo bay campaña duro cu AVP y lo bay yuda e partido haya voto.” Segun Benito e ta retira di eleccion, pasobra esey ta etico, pero e ta ok pa un homber condena y corupto bay campaña cas pa cas? Esey si ta etico? Kico un homber asina por ofrece e famia y hogarnan di e pais aki? Ki cambio AVP kier pretende di por ofrece e pueblo “brasando, celebrando y hasta awor campañando cu corupcion?” Obviamente nada a cambia. AVP a perde tur rastro di consenshi y etica. No tin nada otro pa conclui cu AVP ta e partido cu lo sigui brasa corupcion pa tur eternidad.
