Ley di iniciativa di “Referendum” a wordo entrega na Raad van Advies 

Parlamentario Marco Berlis (MEP):

ORANJESTAD (AAN): Dialuna 19 di Augustus pa 3:00pm tabata un dia grandi y importante, pasobra e ley di iniciativa di “Referendum” a keda oficialmente entrega na Parlamento pa wordo manda pa Raad van Advies. Manera pueblo sa, Aruba no conoce un “referendum” den su constitucion ainda manera Corsou y St.Maarten. Corsou y St.Maarten a revisa y expande nan constitucion na 2010, y a probecha pa inclui referendum, pa pueblo por dicidi riba temanan controversial. 

“Desde 1986 Aruba no tin un referendum regla den su constitucion.”

            Ta un hecho cu Aruba desde 1986 no tin un referendum inclui den su constitucion pa resona e bos di pueblo. Referendum ta un herment cu ta reenforsa e influencia di pueblo den decision crucial cu por afecta e cultura y tradicionan di e pueblo. Ta pesey como iniciador di e ley di “referendum” hunto cu co-iniciadornan colega Hendrik Tevreden, Shailiny Tromp-Lee, Darlaine Guedez-Erasmus, Roderick “Ricky” Hoek, Louisette “Setty” Yarzagaray, Alvin Molina y Arthur Vallejo nos ta sumamente satisfecho y contento di por cuminsa e trayecto oficial di e ley di iniciativa aki den Parlamento. Como representantenan di pueblo ta nos meta pa empodera pueblo y traha leynan pa haci nos democracia mas resiliente. 

Cual ta e trayecto cu e ley di “referendum” mester cana awo?

            E ley a bay Raad van Advies y ta di spera cu e conseho lo por tarda 6-8 siman pa keda cla. Una bes cu e conseho keda cla e ta wordo manda bek pa a iniciadornan. E siguiente paso lo ta pa contesta e preocupacionan di Raad van Advies su consehonan y crea e contestacion den forma di e “Nader Rapport.” Ora e Nader Rapport keda cla ta entrega e Ley, e Memorie van Toelichting (splicacion di e ley), e Conseho di Raad van Advies y e Nader Rapport na Parlamento pa coleganan lesa, analisa y haci pregunta riba dje. Despues di a ricibi e preguntanan nos mester contesta esakinan oficialmente, pa despues den Centraal Commissie un fecha wordo poni pa e reunion publico cu lo bay trata e ley pe wordo aproba of desaproba pa Parlamento. 

            Durante di e ultimo tres añanan mi a bin cu varios idea pa introduci leynan cu lo empodera y tambe cu lo salvaguardia derechonan di nos pueblo. Den e lunanan nos dilanti nos lo introduci otro ley pa Raad van Advies. Nos lo anunci’e pronto, keda pendiente!