ORANJESTAD (AAN) – Parlamentario Raymond Kamperveen, di Plataforma Raiz, den entrevista cu DIARIO, a bisa cu el a presenta un mocion, pa regula y mehora e servicio di taxi.
Kamperveen a recorda cu antes tabata tin un meter den taxi, pero kico a pasa ta cu ora taxi daña of mester di un servicio, no tabata tin un compania pa take care di esey. Anto e taxista a dicidi cu si e meter no ta traha e no ta sigui cu ne. E Parlamentario a señala cu mester wak tur dos banda di medaya, nan a introduci e servicio aki pero no a bay bon y nan no a sigui cu ne, pa sigui traha riba dje y mehor’e.
“Por ehemplo, bo ta haci un bidding, bo ta wak cu un compania ta gan’e, nan tin cu take care e meter pa e taxistanan”, segun e Parlamentario.
El a agrega cu asina por tin un miho pa e turistanan, cu e kier sa kico tin cu paga. Pero den e mocion aki tambe el a trece dilanti, pa e minister tuma un decision, si ta meter of un app moderno cu por tin na telefon, y cu un turista por subi su telefon, download e app, y haya sa précis kico ta e tarifanan.
“Hopi hende ta yega cerca nos y tin turistanan cu tambe ta acerca hende ta bisa cu nan a wordo overcharge, pasobra tin taxistanan ta haci esaki, anto mester busca e control.
“Ora nos ta papia di control, di DTP por ehemplo, e ta controla, por ehemplo, cuanto hende ta subi na e taxinan, si ta segun ley, etc. Aworaki cu mi a wak cu Minister, a base di e mocion ta treciendo cambionan, mi ta bisa cambionan positivo, pasobra un taxista sali di cinco bay siete, ta positivo”, Kamperveen a señala.
El a agrega cu mirando e mentalidad cu comunidad no kier mas taxi riba caminda na Aruba, pasobra tin asina hopi auto na Aruba caba.
El a bisa cu e ta kere cu taxistanan mester uni nan mes conhuntamente, pa nan por yega na decisionnan concreto hunto cu e minister.
“Pasobra den mi mocion tambe mi ta bisa cu tin cu determina tarifanan exacto. E tin cu delibera cu stakeholders. Ken ta stakeholders? Na prome lugar e taxistanan cu ta esnan principal, hunto cu minister. Pero mester check cu hotelnan tambe, pasobra tin biaha ora e prijs ta bira mas caro, kere mi, hopi turista ta bisa no ‘mi ta huur un auto’. Bo ta wak cuanto V-Car tin riba caminda? Esey ta otro cos cu no tin control”, Parlamentario Kamperveen a señala.
