Jennifer Arends-Reyes di AVP:
ORANJESTAD (AAN): Aruba a sali for di e Interparlementair Koninkrijksoverleg (IPKO) 2026 cu un mensahe cla: cooperacion sincero y desaroyo sostenibel mester keda central den Reino Hulandes. Durante e ultimo siman, delegacionnan di parlamentonan di Hulanda, Curaçao, Sint Maarten y Aruba a reuni na nos isla pa intercambia vision y busca solucionnan pa desafio socio-economico comun.
Parlamentario Jennifer Arends-Reyes, lider di fraccion di AVP y presidente di e Comision pa Asuntonan di Reino y Relacionan Exterior di Parlamento di Aruba, a hunga un papel prominente durante e reunionnan. Den su discurso di apertura, el a enfatisa cu confianza y respet mutuo ta e base pa cooperacion efectivo entre e paisnan den Reino, particular den un contexto global di incertidumbre y presion socio-economico.
“IPKO ta tambe pa Reino Hulandes por siña comprende otro mas mihor,” Arends-Reyes a declara. “Si nos kier un Reino fuerte y resiliente, cooperacion y desaroyo mester keda central.”
Durante e deliberacionnan, Arends-Reyes a pone enfoke riba inversion den educacion y riba un miho conexion entre educacion y mercado laboral. El a subraya e importancia di crea oportunidad igual pa hoben Caribense den tur parti di Reino, incluyendo esunnan cu ta biba na Hulanda. Segun Sra Arends-Reyes, fortalecemento di capital humano ta esencial pa garantisa progreso sostenibel.
Tambe a destaca cu Aruba ta compromete cu diversificacion economico, manteniendo turismo como pilar importante, pero cu atencion special pa sostenibilidad ambiental, innovacion y bon gobernacion. Segun Arends-Reyes, un economia diversifica y un gobernacion solido ta fundamental pa fortalece posicion di Aruba dentro di Reino.
IPKO 2026 a sirbi no solamente como un reunion formal, sino como un plataforma pa fortifica cooperacion parlamentario entre e cuatro paisnan. Representantenan di e presidencianan di Eerste y Tweede Kamer di Hulanda, hunto cu delegacionnan di Aruba, Curaçao y Sint Maarten, a participa activamente den dialogo constructivo cu meta di mantene un Reino fuerte y prepara pa futuro.
E informacion y experiencia adkiri durante IPKO lo wordo comparti y trata mas profundamente den Parlamento di Aruba, cu meta di traduci dialogo na accion concreto.
Fraccion AVP ta reafirma su compromiso pa sigui traha den un spirito di respet, unidad y responsabilidad comparti pa beneficio di tur ciudadano den Reino Hulandes.
{gallery}IPKO mester sirbi pa comprende otro miho, coopera y avanza den Reino Hulandes{/gallery}
