Parlamentario Evelyn Wever-Croes:
Parlamentarionan Hulandes tin hopi interes pa haya mas informacion
ORANJESTAD (AAN): Di 19 pa 21 di februari 2026, Aruba tawata e anfitrion di e Interparlementair Koninkrijksoverleg (IPKO), un reunion di nivel halto cu ta reuni delegacionnan parlamentario di Aruba, Corsou, Sint Maarten y Hulanda. E reunionnan a tuma luga principalmente na Hyatt Place Aruba, cu varios session habri pa publico.
E programa di tres dia tawatin un agenda strategico y orienta riba futuro y enfoca riba reforsa cooperacion den Reino.
Parlamentario Evelyn Wever-Croes, na final di e programa diadomingo, a expresa su satisfaccion con e reunionnan, intenso y hopi fructifero, a bay na unda tawatin hopi topico interesante, entre otro, a haya presentacion hopi elabora di Aruba Airport Authority (AAA) y tambe a bishita airport pa wak e avansenan di expansion di aeropuerto. E parlamentario a remarca cu e ta contento cu proyecto a continua bou di e gobierno actual y cu te hasta ta bayendo mas adelanta di loke a plania.
Entre otro tambe tawatin presentacionnan tocante Siguridad Nacional, Cyber Security, Cambio Climatico y Cuido di Adultonan Mayor. Pero, segun e parlamentario, e seccionnan mas importante tawata esunnan inoficial y e contactonan cu a wordo crea.
E tema di Hofa, e parlamentario e menciona, tawata topico constant durante e reunionnan. Mirando cu esaki no tawata un punto di agenda di Ipko, Fraccion di MEP a trece e tema aki padilanti durante e encuentronan informal. Parlamentarionan Hulandes tin hopi interes pa haya mas informacion di e topico aki.Tambe Fraccion di MEP a pidi pa inclui e temanan aki, cu ta temanan dificil, manera Hofa, deficit democratico, relacionnan den Reino, entre otro, den e siguiente reunion di Ipko.
“Mas y mas e Parlamentarionan Hulandes mes ta haci preguntanan pa nan haya mas informacion mirando cu nan ta esnan cu tin pa bay trata e ley aki den caso cu gobiernonan di Aruba y Hulanda dicidi di continua cu esaki”, Parlamentario Wever-Croes a expresa.
Parlamentario Wever-Croes a expresa cu Aruba a saca cara y a elogia participacion di Fraccion di MEP y e forma cu cada un a presenta nan mes durante e reunionnan di Ipko 2026.
