Segun Eduard Pieters di PPA:
ORANJESTAD (AAN): Den e discusion politico actual, parlamentario Eduard Pieters di fraccion di PPA a pone un pregunta esencial riba mesa: con gobierno ta trata e mayoria di pueblo Aruba? Mientras gobierno ta scoge repetidamente un grupo di pensionado pa beneficia di e alivio di costo di bida, di cual PPA ta contento pa nan, alrededor di 25.000 hende cu ta cobra mas o menos salario minimo of ta yega na e “bestaansminimum” y cu ta forma parti di e clase medio ta keda atras. E resultado ta cla: presion creciente riba e clase medio y un riesgo real unda mas hende por cay den pobreza.
Esey ta loke Pieters a declara e siman aki durante un conferencia di prensa. “Nos ta conoce e cifra di e bestaansminimum y nos sa cu, aunke salario minimo a haya aumento, e no ta yega na e nivel cu un hende por biba cu dignidad na Aruba. Sinembargo, djis sigui hisa salario minimo, no ta un solucion sostenibel tampoco. Cada aumento di salario ta sigui cu casi automaticamente aumento di e prijsnan, paso e comerciantenan mester cubri e costonan mas halto. Asina, poder di compra no ta mehora; e problema ta move di un caminda pa otro,” Eduard Pieters a vocifera.
Segun PPA, e enfoke mester ta diferente. Gobierno mester baha su gastonan. Aruba tin suficiente espacio fiscal pa haci esaki y solamente door di un reduccion serio di gasto publico, gobierno por crea alivio economico y fiscal real pa pueblo. Esaki lo traduci directamente den mas poder di compra pa e hendenan, sin crea un spiral di aumento di prijs.
Pensionadonan, AZV y honestidad politico: Tocante e pensionadonan, Eduard Pieters, parlamentario di PPA ta pone un otro punto fuerte: “AZV no ta un institucion cu ta perde placa. Al contrario, AZV tin un surplus di miyones di Florin. Si asina ta e caso, pakico no por haci excepcion pa e pensionadonan cu ta keda afor di e alivio? Pakico no por mehora poder di compra di TUR pensionado?”
Gobierno mester ta honesto y bisa claramente kico a wordo evalua y pakico no tur pensionado ta beneficia. Segun Pieters ta bon pa recorda kico e politiconan a campaña cu ne: “Specialmente considerando cu durante campaña, AVP a priminti aumento pa tur pensionado, no pa un grupo chikito so. Promesa politico mester ta honra, no reinterpreta despues di eleccion”.
PPA ta adverti cu ta gobernando Aruba sin un plan y vision financiero concreto. Gobierno ta sigui fia placa pa mantene un cierto nivel di gasto, mientras economia ta draai bon y ta creando surplus. Eduard a expresa: “E pregunta clave ta: pa ken e surplus aki ta sirbi? Pa un grupo specifico, of pa e bon comun, manera nan ta expresando hipocritamente? Nos ta mira e alivionan fiscal cu gobierno a presenta, pero tambe tin pregunta serio, specialmente ora alivio fiscal ta aplica pa hende cu no ta residente na Aruba, mientras e hendenan cu ta biba y traha aki no ta sinti e beneficio real”.
‘Doek op’ algun departamento: PPA a indica cu desde campaña, ta varios departamento ta obsoleto y mester ta reorganiza, kisas privatisa cu un enfoke cla riba nan ‘core business’. Ademas, e sistema di BBO ta sigui presiona consumidornan. “Un sistema di BTW, si prepara y implementa cu un bon maneho, por ta mas husto y no lo ta acumulativo manera e BBO actual, unda cada aumento chikito den costo ta resulta den aumento grandi pa e consumidor na final.”
Finalmente fraccion di PPA ta convenci cu si gobierno no actua cu responsabilidad y vision, Aruba ta core riesgo di enfrenta reto financiero serio den futuro cercano. Politica social y economico mester ta inclusivo, husto y sostenibel. Alivio selectivo y gasto sin control no ta solucion. PPA ta boga pa un otro caminda: un gobierno cu ta baha su gastonan, fortalece poder di compra y traha pa e bienestar di pueblo completo di Aruba, no solamente pa un grupo.
