Hopi hende ta cansa di e partidonan grandi

ORANJESTAD (AAN) – Pa Seraida Pemberton-Leonard, ta lider politico di Partido UPP, ta un reto grandi aunke el a lidera Stichting Reclassering pa varios aña.

E ta sinti cu liderando un team fuerte di UPP, ta un experiencia hopi bon. El a haya hopi support di su mesun team y e ta yama danki na cada un di nan.

El a tuma e reto di ta un Trahador Social, bay como Directora di Stichting Reclassering, pa di aki bay den politica e ta un stap hopi grandi, pero necesario, mirando cu tin problemanan structural bao di nos poblacion.

Seraida ta mira cu e problemanan social na Aruba cada bez ta bira mas grandi y su curazon ta pa e  hobennan, y e ta mira cu e criminalidad bao nos hobennan cada bez ta aumenta, y mester di otro maneho. E aspecto di abuso di mucha, abuso den famia, pobreza, desempleo ta factornan cu ta refleha den Seraida su trabao, y pa añanan el a keda boga y pusha cu mester bin un cambio.

E ta haya cu e eleccion aki ta hopi dudoso y hendenan cu ta papia cu UPP ta bisa cu nan ta cansa di e dos partidonan grandi y mester tin e chens pa e partidonan chikito bay aden, pasobra si Aruba no tin un parlamento stabil y integro e ta keda haya e mesun problemanan.